Na “war shock” nagpaligis sa iyang ulo sa bus patay

CEBU, Philippines - Maayong pagkapisat sa ulo sa usa ka giingong kanhi sundalo human kini gikatahong tuyong nagpaligis sa usa ka bus diha sa dalan Magallanes pasado alas-9 sa miaging gabii.

Ang biktima giila sa ngalang Nicolas Enriquez, 50, molupyo sa barangay Mabolo dakbayan sa Sugbo diin patay diha diha dayun human malatayi og Ceres bus. Matud pa sa konduktor sa Ceres Bus nga si Alvin Paul nga gikan sila sa ilang garahian sa dakbayan sa Mandaue ug patubang sila sa South Bus Terminal aron mobiyahi.

Tuod man, samtang nagpatubang sila sa south bus naabtan sila og stop signal diha sa maong dapit  apan dihang mi go signal na,kalit lang mga mi-untol ang ilang sakyanan.

Tungod kay nakalitan sila sa pag-untol ug gipara sila sa mga tawo dali silang mihunong ug ilahang gisusi kun ngano. Mao nalay ilang nakit-an ang biktima nga nagbuy-od na sa ilawom sa ilang bus ug napisat ang ulo.

Matud pa ni Yoli Mahusay ang nakaila sa biktima nga wala nay nagtagad sa biktima sukad nga mipanaw ang inahan niini.

Gani, nasayran usab nga ang biktima kanhi sundalo ug gihulagway nga na war shock hinungdan nga gikatahong susama sa wala na kini sa maayong pangisip.

Giingong sa wala pa mahitabo ang insidenti ang biktima didto kini sa Carbon Public Market ug nagbaklay balik sa South Bus Terminal aron mangita og makaon apan wala lang damha nga mao na diay kadto ang iyang pagabuhaton.

Ang Traffic Group mipahigayon  og imbestigasyon bahin sa alegasyong gituyo sa biktima ang pagbangil sa iyang ulo ngadto sa maong bus.

Samtang ang drayber sa maong bus nga si Elprido Aypana kasamtangang gitanggong sa karsel sa kapolisan ug gipaabot pa kung dunay mopasaka og kaso batok niini. (BANAT NEWS)