Tiguwang gilunggoan og ulo
CEBU, Philippines - Nagkawil na ang liog dihang nakaplagan ang usa ka 75-anyos nga mag-uuma nga giingong gilunggoan sa iyang ulo sa iyang kontra samtang nangompay diha sa barangay Sagay sa siyudad sa Toledo niadtong Sabado sa 1:30 sa hapon.
Ang biktima gipatay diha sa iyahang umahan ug giilang si Marcelino Aniñon, 75, samtang ang suspek mao si Concordio Rodimo,65, taga barangay Panibago sa lungsod sa Pinamungahan.
Matud ni SPO4 Gil Lastimosa, desk officer sa Toledo City Police Station dihang nahinabi sa Banat News, ang asawa sa biktima nga si Genara Aniñon, 73, mitug-an nga nangompay sila sa iyang bana aron ipakaon sa ilang mga binuhi nga hayopan dihang kalit nga niabot ang suspek nga pwerting sukoa.
Matud pa sa way daghang estorya gidunggab dayun sa suspek ang iyang bana diha sa tiyan hinungdan sa pagkalup-og niini.
Apan inay lung-an gikatahong gitiwasan kini ni Rodimo pinaagi sa pagulgol sa liog niini hangtud nga kini naputol.
Ang suspek daling misibat sa lugar ug wala na maabti sa mga mirespondeng polis.
Ang kapulisan padayon pa sa pagtino sa hinungdan sa grabeng kasuko sa suspek ngadto sa biktima ug nganong nabuhat niini ang maong linoog nga pagpatay. (BANAT NEWS)
- Latest
