Problema sa traffic sa tabunok sulbaron

CEBU, Philippines - Ang kasamok ug kahuot sa trapiko diha sa Tabunok ilabi na diha ilawom sa flyover sa maong lugar gisaad nga mapangitaan og paagi aron masulbad sa bag-ong hepe karon sa City of Talisay-Traffic Operation Development Authority (CT-TODA).

Naobserbahan ilabi na panahon sa gabii ang kahuot sa karsada diha sa Tabunok tungod kay ang mga traysikol dili kini adto moparada sulod sa parking area.

Apan matag gabii usab diha sa parking area dunay mga manindahay og mga RTW, sapatos, ukay-ukay ug uban pa ang maninda diha sa maong lugar.

Si Placido Labajo, hepe karon sa CT-TODA nagkanayon nga gipangitaan nila og paagi nga masulbad ang problema sa trapiko.

Gani matud niya nga ang mga PUJ nga magbiyahe gikan sa barangay Jaclupan ug Camp 4 paingon sa Tabunok dili na moparada diha daplin sa karsada tungod kay gihatagan kini og lugar nga pundohanan diha sa daang merkado sa Tabunok.

Matud ni Labajo nga gibana-banang 20 ngadto sa 30 ka mga PUJ gikan sa mga bukirang barangay ang magbiyahe matag adlaw diin kaniadto anha kini magpundo diha daplin sa karsada paingon ngadto sa barangay Lagtang.

Ang maong pagpundo sa mga PUJ sa daplin sa karsada usa kini sa nakahatag og hinungdan sa kahuot sa trapiko.

Ang mga PUJ nga nagbiyahe gikan sa dakbayan sa Sugbo duna nay gigahing unloading area diha dapit sa parking area sa mga traysikol.

Matud usab ni Labajo nga ang rail links nga koral sa daang merkado i-irog nila kini pasulod nga tulo ka metros ang gitas-on aron makaukopar kini og tulo ngadto sa upat ka PUJ nga magpakanaog og mga pasahero gikan sa dakbayan sa Sugbo.

Gilauman ni Labajo nga sa maong sitwasyon maaghat na usab ang mga traysikol sa pagsulod ngadto sa parking area tungod kay ang mga pasahero adto na man unya kini magtapok.

Ang maong mga PUJ inig human niini og pakanaog sa mga pasahero adto kini sila paagion na sa Colis road balik sa ilang rota aron dili kini makahuot sa trapiko diha ilawom sa flyover.  (BANAT NEWS)