Samsam mobubo og pundo sa iyang distrito

CEBU, Philippines - Si Kongresista Gerald Anthony “Samsam” Gullas sa unang distrito gikatakdang mohatag og pinansiyal nga hinabang ngadto sa kabarangayan sa dakbayan sa Talisay.

Matud ni Samsam nga matag unom ka buwan makadawat unya og pinansiyal nga hinabang ang mga kapitan sa 22 ka barangay sa Talisay gikan sa iyang Priority Development Assistant Fund (PDAF).

Tumong ni Samsam nga ang kabarangayan duna dayon kini magamit nga pundo alang sa ilang mga proyekto.

Gawas niini, si Samsam mobutang usab og pundo ngadto sa Department of Public Works and Highways (DPWH) alang sa ubang mga proyekto sa Talisay.

Sa lungsod sa San Fernando, si kanhi mayor Lakambini “Neneth” Reluya maoy saligan ni Samsam sa mga proyekto sa nahisgutang lungsod apan ang budget nga iyahang igahin adto usab niya ipaagi sa DPWH.

Lakip sa hatagan og pundo ni Samsam mao ang mga scholars nga mga kabus nga estudyante sa iyang distrito.

Gikatakdang 800 ka mga scholar lakip na niini sa TESDA ang ipaubos ni Samsam sa iyang “Samsam Gullas Scholarship Program” karong ikaduhang semester sa klase.

Gibutyag kagahapon ni Samsam sa mga tigbalita nga ang iyang apohan nga si kanhi Kongresista Eduardo Gullas dunay 60 ka mga scholars sa Commission on Higher Education (CHED) sa unang distrito.

Gawas niini ang kanhi kongresista dunay mga 100 ka mga scholar sa TESDA.

 Matud ni Samsam mokuha pa siya og dugang pang scholars ug mohangyo siya kang TESDA Secretary Joel Villanueva nga mohatag pa og dugang scholarship aron daghan pa ang matabangan diha sa iyang distrito.

Gibutyag ni Samsam nga makig-istorya siya kabahin niini sa mga mayor sa unang distrito. Ang budget nga igahin alang sa mga scholars maggikan gihapon sa iyang PDAF.

Matud niya nga mokuha sila og 100 ka scholars sa Sibonga Community College, 100 sa Carcar City College, 50 sa Cebu Technological University sa lungsod sa San Fernando, 100 sa Talisay City State College.

Samtang sa dakbayan sa Naga ug Minglanilla nga wala pay mga tunghaan sa kolehiyo gahinan usab kini og pundo ni Samsam sa scholarship program.  (BANAT NEWS)