Bukirong Brgy Susihon kun may pansayan

CEBU, Philippines - Ang chairman sa komitiba sa panglawas sa konseho sa Talisay nga si Richard Francis “Choy” Aznar mipasusi ngadto sa kabarangayan ilabi na sa bukirang barangay sa Talisay pagsuta kung duna na bay mga pansayan ang mga residente sa lugar.

Nabalaka si Aznar nga karong panahon sa ting-uwan basin masagolan og hugaw sa tawo ang mga tinubdan sa tubig nga makamugna unya sa mga sakit-sakit.

Kahinumduman nga sa milabay’ng mga tuig dunay mga nadangat sa tambalanan nga mga residente sa bukirang barangay human kini nakasinati og panakit sa tiyan, suka ug kalibang.

Giingong usa sa hinungdan sa ilang mga sakit mao ang tubig nga ilang nainom diin gikan sa mga tubod nga nakontaminado ug mga kagaw tungod sa nasagolan og hugaw ug ihi sa tawo lakip na sa mananap.

Si Aznar nagkanayon nga nakigtinabangay siya sa city health office ug ang una niyang ipasusi mao ang mga tunghaan sa mga barangay lakip na niini ang mga kabarangayan nga naa sa ubos nga bahin.

Ang mga bukirang barangay sa siyudad naglangkub kini sa Manipis, Maghaway, Tapul ug Camp 4. Ang milabay’ng administrasyon nakapanghatag na kaniadto og mga toilet bowl alang sa walay mga pansayan.  Matud ni Aznar nga mosusi gihapon sila ngadto sa mga lugar aron pagsuta kung duna na bay mga pansayan ang tanan. (/EIM) (BANAT NEWS)