Mga konsehal nagkahiusa sa liga

CEBU, Philippines - Nagkahiusa ang mga konsehal sa mga syudad ug kalungsuran sa lalawigan sa Sugbo sa ilang pagpapili sa mga opisyal sa Philippine Councilors League Cebu Provincial Federation karong Lunes.

Kini gumikan kay gikan sa nagkalainlaing partido ang mga kandidato sa grupo ni Bokal Carmen Remedios Durano-Meca kinsa walay moatbang sa ilang pagpapili sa pagka-pangulo sa maong grupo.

Walay laing nitumaw nga grupo nga niduso sa ilang sertipiko de kandidatura sa buhatan sa Department of Interior and Local Government (DILG) hangtud sa katapusang adlaw niadtong Miyerkules.

Si Meca nga sakop sa Barug Alang sa Kauswagan ug Demokrasya (Bakud)-Liberal Party nipili gihapon sa iyang bise presidenti nga si Konsehal Eduardo “Digul” Gullas III sa dakbayan sa Talisay ubos sa Alayon-Nacionalista Party sa mao gihapon nga posisyon.

Ang Alayon, NP ug National Unity Party mga kaalyado sa United Nationalist Alliance (UNA) ug One Cebu Party sa niaging eleksiyon sa Mayo 13 ug ilang kaatbang ang Bakud-LP sa Sugbo.

Si Konsehal Jeffrey Anthony Yapha (LP) sa Pinamungahan sa pagka secretary-general samtang si Konsehal Gamaliel Lumapas (Bakud) sa Sogod magpasubli sa pagka-treasurer.

Ang mga sakop sa LP nga sila si Konsehal Irving Gamallo sa Samboan pagka auditor; Geronimo Almirante sa dakbayan sa Bogo sa pagka public relations officer; ug Julius Alegado sa Consolacion isip business manager.

Ang mga board of directors mao sila si Konsehal Nenita Layese (LP) sa dakbayan sa Mandaue, Samuel Moralde (NP) sa Daanbantayan, Erwin Gica (LP) sa Dumanjug, Napoleon Enrique Teves (LP) sa Santander, Emmanuel Jo (One Cebu) sa Balamban, Rajiv Enad (NP) sa Minglanilla, Othello Chiong (NP) sa dakbayan sa Naga, ug Neal Vergara (Bakud) sa  Borbon. Sila si Moralde, Jo, Teves ug Chiong ang magpasubli sa ilang katungdanan. (/EIM) (BANAT NEWS)