Kawani sa Argao naligsan patay

CEBU, Philippines - Patay ang  kawani sa lungsod sa Argao human kini   ligsi  og sakyanan samtang nagmaneho sa motorsiklo  didto sa highway sa barangay Guiwanon, sa lungsod sa Argao niadtong Martes sa alas 6:00 sa gabii.

Ang biktima  mao si Victor Coyoca, 38, minyo, molupyo sa maong lugar ug giingong kawani sa lungsod   nga nadistino sa clean and geen program.

Samtang ang nagmaniho sa nakadasmag nga Toyota Hi-lux mao si Floro Andaya, hingkod, ug molupyo sa Bantayan, Dumaguete City.

Subay sa spot report sa Argao Police Station nga giduso sa operations branch sa Cebu Police Provincial Office (CPPO) pinaagi ni PO1 Jomelyn Abarquez, nasuta sa pasiunang imbistigasyon  nga ang biktima nagsakay sa motor ug  ang Toyota Hi-Lux  gikasugat niini   sa pikas  nga dereksiyon paingon sa norte nga bahin. Apan  sa  pag-abot sa maong lugar ang motorsiklo nasaghiran sa sakyanan ug nalamba,  samtang   wala na ma-kontrolar   sa drayber  ang  iyang Toyota busa nalatayan gyud ang biktima  sa lawas ug maayong pagkapisat  nga  maoy hinungdan sa hinanali niining kamatayon.

Gisuwayan pa unta  kini  og hatud   ngadto  sa Isidro Kintanar Memorial Hospital apan patay na kini.

Samtang ang drayber sa Toyota Hi-lux boluntaryo   nga  nitahan sa iyang kaugalingon sa kapolisan ug nabalhug na karun sa karsel samtang gihikay ang kasong ipasaka batok kaniya. (BANAT NEWS)