Magtiayon gisaka gipamusil usa patay

CEBU, Philippines - Patay nang nahidangat sa tambalanan ang usa ka gipasanginlang gun-for hire ug gipasanginlang tigpayuhot og ginadiling drugas sa lungsod sa Barili samtang samaran usab ang  kapuyo niini human gipaulanan og bala sa wa pa mailhing mga tawo pasado alas 2 sa kaadlawon kagahapon diha sa barangay Giloctog.

Ang namatay nailhan nga si Jomar Cameros alyas Jerome, 24, usa ka kanhi bus helper human kini maigo sa dughan ug sa iyang abaga. Samtang nalandig usab sa tambalanan ang iyang kapuyo nga si Jennelyn Lomayno, 25, human kini makaangkon og samad sa iyang paa.

Sa pakighinabi sa Banat News ni PO2 Jorvi Timagos sa Barili Police nga ang magtiayon natulog  sa ilang balay dihang gisampit gikan sa gawas sa mga wala mailhing tawo.

Tungod kay wala kini motubag, giingong pugsanong gisulod ang panimalay sa biktima ug didto gipusil si Jomar sa iyang walang bahin sa dughan ug abaga. Ang asawa niining si Jennelyn nga nahigmata tungod sa sunod-sunod nga buto dali usab nga nakabangon apan giapil usab kini sa pagpusil sa iyang paa.

Ang duha daling nakapangayo og tabang sa kasilinganan ug dali usab silang gidala sa tambalanan apan si Jomar gideklarar kini nga dead on arrival.

 Si Chief Insp. Arvi Arbuis, hepe sa Barili Police Station, mibutyag nga dako ang posibilidad nga illegal drugs ang motibo sa maong pagpamusil kay aduna sila’y nadawat nga impormasyon nga nalambigit sa drugas si Cameros.

Gani adtong Sabado, pista sa lungsod, gi-rekisa ni Arbuis si Cameros human makadawat og taho nga nagdala kini og shabu apan wala sila’y nakuha gikan kaniya.

  “Sa akong pagkahibalo tua na sa iyang kauban napasa na,” matud ni Arbuis.

Nagduda ang kapulisan nga .40mm nga pistol ang gamit sa suspek base sa duha ka mga kabhang nga na-recover.

Matud pa nga si Cameros usa usab ka gun-for-hire apan naka-parole on probation kini.

“Na-priso na man ni sa CPDRC (Cebu Provincial Detention and Rehabilitation Center) pero wala na ko kahibalo kanus-a lang nakagawas,” si Arbuis midugang.

Matod pa ni Timagos nga ang mamumuno yano lang kaayong milakaw human sa krimen.

Giingong wala makamay-ong sa dagway sa killer ang kapuyo ni Jomar tungod usab sa kakalit sa maong hitabo. (BANAT NEWS)