Rama moawhag sa Konseho nga tugutan siyang makabaligya sa mga luna sa SRP

CEBU, Philippines - Si Mayor Michael Rama moawhag sa Cebu City Council nga tugotan siya nga makabaligya og yuta nga iya sa City Hall aron ang halin magamit sa pagmugna og lainlaing proyekto nga ipatuman niya hangtud sa tuig 2016.         

Ang Department of Engineering and Public Works (DEPW) nga gipangulohan ni City Engineer Kenneth Carmelita Enriquez mipahibalo nga daghan kaayo siya og mga proyekto nga buot ipatuman sugod sunod tuig.

Ang mga proyekto nga buot ipatuman ni Enriquez mao ang pagpalambo sa drainage systems aron malikayan na ang lunop-baha kun adunay uwan, pagpasemento sa mga karsada ug pagpalit og mga heavy equipment.

Si Enriquez mibutyag nga daghan sa mga drainage system sa dakbayan sa Sugbo dili na kaayo makapahubas sa tubig kun adunay uwan kay napuno na kini sa mga lapok.

Matud ni Enriquez nga duna pa gani uban sa mga drainage systems nga dili na haom tungod kay gagmay kaayo ug dili na kini makasugakod sa kusog nga bul-og sa tubig kun adunay kusog nga uwan. Sa drainage system, si Enriquez misugyot nga gahinan sa dakbayan og P246 milyones apan anam-anamon kini sa pag-budget sulod sa tulo ka tuig hangtud sa 2016.

Apan ang pagpalambo sa nag-unang kasapaan dinhi sa dakbayan nagkinahanglan kini og kapin sa P1.8 bilyones ug anam-anamon gihapon kini sa pag-budget sa tuig 2014 ug sa mosunod pa nga duha ka tuig.

Si Enriquez nagkanayon nga sa pakisusi nga ilang gihimo adunay 10,830 ka panimalay sa lainlaing dapit sa dakbayan sa Sugbo ang kanunay malunopan kun adunay mobunok nga kusog nga uwan. Kini maoy rason nga ang DEPW misugyot nga gahinan og dul-an sa duha ka bilyon ka pesos alang sa pagpalapad ug pagpalawom sa atong kasapaan.

Sa laing bahin, matud ni Enriquez nga gamay ra kaayo ang mga karsada dinhi sa dakbayan nga maayo ang kondisyon kay sagad kasarangan lang ug gani aduna g’yuy mga karsada nga hilabihan kabati. Gisugyot usab ni Enriquez nga gahinan og kapin sa P21 milyones aron matuman ang proyekto sa mayor nga palamboon ang road connection paingon sa mga provincial roads sa kanait nga mga lungsod.

Usa sa unahon sa DEPW mao ang karsada nga magdugtong sa Barangay Mabini paingon sa Panas, Consolacion unya gikan sa Barangay Paril ngadto sa Tag-ube, Compostela ug sa Lusaran ngadto sa Tag-ube dayon sa Mahagnao, Danao.

Apan misugyot usab ang city engineer nga mopalit ang dakbayan og 23 ka heavy equipment sama sa bulldozer, payloader ug uban pa nga mokantidad og gibana-bana P130 milyones.

Matud ni Rama nga mahatagan ra kini og katumanan kun ang konseho mouyon nga siya makabaligya og yuta aron igasto sa mao nga mga proyekto.  (BANAT NEWS)