Ang unod sa SONA ni Pres. Aquino (Unang parte)

CEBU, Philippines - Taas pa ang latason sa administrasyong Aquino, kini maoy panapos nga mensahe ni Presidente Benigno Simeon Aquino III sa iyang ikaupat nga State of the Nation Address diha sa atubangan sa mga magbabalaod kagahapon sa Batasang Pambansa Complex.

Si Aquino nagkanayon nga dili sayon nga tahas ang iyang pagdawat pagkapresidente sa nasud apan wala siya gipadako sa iyang mga ginikanan aron moluhod sa maong hagit. Ug sa iyang pagtuo husto ang iyang gihimo.

Matud pa ni Aquino  8,581 na ka mga sitio ang nabutangan og linya sa kuryente; ug karon 28,398 na ka pamilya nga informal settlers ang nahatagan og desenteng pinuy-anan;  padak-an pa ang 40 bilyones pesos kada tuig nga pundo alang sa edukasyon, panglawas ug serbisyo publiko,

Sumala pa niya tungod sa sakto ug maayong sistema sa pagkolekta sa buhis nabatyagan na sa kadaghanan ang kausaban karon sa pamuyo sa nasud ug nalipay siyang dili lang siya maoy nagpas-an sa pagsulbad niini tungod kay miabag ang tanan aron kab-uton ang lisod nga tahas.

Gipahibalo usab sa presidente ang pagsaka sa gidaghanon sa mga TESDA-DOLE Scholars diin  503,521 na ang nakatapos sa ilang pagtungha karong tuiga ug unom kada napulo niini ang nakatrabaho.

Palambuon pa usab sa nasud ang  electronics and semiconductor program  niini nga misaka na og 85 porsyento sa kataposang bahin sa tuig 2012 ang nakatrabaho. Matud pa niya timaan kini nga ang mga Filipino kung magtinabangay moani og alang sa kinabag-an.

Gisaad usab ni P.Noy nga palapdan pa ang Pantawid Pamilyang Pilipino Program nga kaniadto 700,000 ra ka pamilya ang nakabenepisyo apan karon miabot na og 4 million ang natabangang pamilya. Plano ni Aquino nga hasta ang 18-anyos nga kabataan gikan sa mga kabus nga pamilya matabangan sa maong programa aron sila makahuman sa high school.

Samtang  gipahibalo usab ni Aquino nga nasulbad na ni kalihim Brother Armin Luistro sa DepEd ang problema sa kakulangon sa libro nga kaniadto ang presyo  58 pesos karon mapalit na kini og 30 pesos.

Matud niya kung gipaningkamotan na kini kanidto pa sa nangaging administrasyon naka-save unta ang gobiyerno og 2.9 billion pesos nga magamit pa unta sa pagpahimo ug pag-repair sa 9,502 ka lawak-saringan.

Pahingusgan usab ni Aquino sa nahibilin niyang panahon sa Malacañang ang Agrikultura. Matud pa niya niadtong 2010 mipalit ang nasud og  2 milyones metriko tonelada nga bugas. Apan niadtong 2011 sa unang tuig sa iyang paglingkod nahimo na lang kining 855,000 metric tons.

Sa tuig  2012:  500,000 metric tons na lang ug karong 2013:  kinadak-an na ang minimum access volume nga 350,000 metric tons lakip na niini ang 187,000 metric tons nga reserbang buffer stock alang sa pagpangandam sa mga katalagman. Nagtuo siyang on-target pa gihapon ang administrasyon sa rice self-sufficiency, ug di na unya kinahanglan pang moangkat og bugas sa mga pribadong sektor.

Matud pa niya misaka og  3.3 percent ang maong sektor sa unang tulo ka buwan ning tuiga.  Mi-triple ang pagsaka niini gikan sa 1.1 percent growth kaparehas nga mga buwan sa  2012 ug masaligon siyang pinaagi niini magbunga og maayo ang tanan ilabi na sa mga mag-uuma. (BANAT NEWS)