Pagkawat sa 500 sakong smuggled rice sa Cip yard imbestigahon sa ombudsman
CEBU, Philippines - Usa ka fact-finding investigation ang himuon sa Office of Ombudsman-Visayas kabahin sa nangawala nga sinakong bugas sud sa container yard sa Cebu International Port.
Ang maong mga bugas nga nangawala miabot og 500 ka sako gihiposan sa Bureau of Customs (BOC)-Cebu diha sa maong yarda gumikan kay wala silay bodega nga kabutangan niini.
Si Deputy Ombudsman for the Visayas Pelagio Apostol namahayag nga makigkita sila sa Commission on Audit (COA) ug sa BOC para sa pagkuha og ebidensya.
Gibana-banang kapin 500,000 ka sakong bugas ang nasakmit sa BOC nga nagkantidad og P1.2 billion. Kini nasakmit niadtong Marso hangtod Abril sa karung tuiga. Ang maong bugas naggikan sa Vietnam ug kini mga smuggled rice.
Base sa report nga mis-declared ang gisudlan sa mga bugas ug kini giingong mga stone slabs, ceiling insulator slabs, granite slabs ug wall insulator slabs.
Si Apostol nagkanayon nga ang posibleng tawo nga angayang manubag sa pagkawala sa mga bugas mao ang mga customs guards, district collector ug ang in-charge niini ug posible silang kasohan og negligence, anti-graft ug malversation. (BANAT NEWS)
- Latest
