Bata gikulata gi-rape

CEBU, Philippines - Gibun-og una pa gilugos ang 6- anyos nga batang babaye kinsa luya nang napalgan sa mga kabanay niini taliwa sa katubhan diha sa  usa sa mga barangay sa lungsod sa Medillen niadtong Domingo sa alas 2:30 sa hapon.

Ang biktima molupyo sa nahisgutang lugar samtang ang suspek mao si Arnel Booc, 22, nagpuyo sa barangay Canhabagat, Medillen ug nagtrabaho sa katubhan sa maong lugar.

Matud ni SPO1 Orlando Batusin sa Medillen Police Station dihang nahinabi sa Banat News migawas sa ilang panimay ang biktima aron motubag sa tawag sa kinaiyahan diha sa katubhan apan nahibulong sila nga wala na kini makabalik.

Ang apohan  sa bata daling mimando sa mga kabanay nga pangitaon ang bata ug giingong usa sa mga mitanyag nga motabang sa pagpangita ang suspek.

Sa tanto nilang pagsiksik sa katubhan ilang nabangalan ang bata nga nalup-og na sa yuta nga nagkadugo ang bilahan ug naputos og bun-og sa kalawasan ilabi na sa paa ug sa bukton.

Dali nila kining gidala sa Verallo District Hospital sa siyudad sa Bogo ug didto giingong mitug-an ang bata kung unsay nahitabo kaniya ug gitumbok ang suspek nga maoy mihimo kaniya sa maong salaod.

Matud pa sa biktima pugsanon siyang giguroy sa suspek ngadto sa katubhan ug didto bisan sa iyang pagsupak gilugos siya niini human gibun-og.

Tungod sa gibutyag sa bata, nagpanon ang mga paryente niini ug gisulong ang suspek ug didto ilang gitabangan og kulata.

Ang kapolisan nga uwahi na sa pag-abot igo na lang midala kang Booc sa tambalanan ug giingong didto miangkon kini sa iyang gibuhat ug nangangkong bisan siya nahibulong ngano iyaha kadtong nabuhat sa biktima.

Kasohan ang suspek og pagpanglugos tungod sa iyang gibuhat. (BANAT NEWS)