2 ka mananagat gitigbas angol sa kauban

CEBU, Philippines - Duha   ka  mananagat  ang naangol   human  tigbasa  sa  kauban  nilang    mananagat  atol  sa  ilang  panag-inom  didto sa barangay Kinatarkan, lungsod sa Sta Fe    sa milabay’ng  gabii. 

Ang mga biktima mao sila si Grego  Derder, 29  ug  Raul Gila, 38,  pulos  minyo,  mga mananagat,  ug  managsilingan  sa maong lugar.

Samtang ang suspek mao ang ilang kauban nga mananagat nga si Jonathan Flores, 33, ulitawo,  nga  ila  ra  usab  nga  silingan.

Si PO2 Erik Ilustrisimo sa Sta Fe Police Police  Station  mibutyag  sa Banat News   nga ang mga biktima ug suspek nag-inom  sa wala  pa ang hitabo.

Dihang nangahubog na nagpunay og   komedyahay ug dihang wala  makaagwanta  ang suspek , nasuko kini nga  misangpot  sa ilang panaglalis.

Unya  miinit ang  lalis  ug  ang  suspek   mikalit og  pauli.

Pagbalik  niini  nagdala  na  og  sundang  dayon  giduslak  ang  tiyan  ni Derder.

Samtang  si  Gila  nga misuway unta og badlong , gi-atake   usab  ug natigbasan sa  walang bahin sa abaga.

Ang suspek kinsa  buot  untang  moikyas  human sa hitabo, apan nadakpan atol sa hot pursuit operation nila ni SPO1 Romeo Placencia ug mga tanod sa lugar .

Nabalhug  na  karon  sa karsel samtang gihikay  usab ang kasong ipasaka batok   kaniya.

Ang  mga  biktima gihatud  dayon   ngadto sa Bantayan District Hospital apan gihulagway nga luwas na sa delikadong kahimtang.( /WC) (BANAT NEWS)