CEBU, Philippines - Ang tagdumala sa burial ug cash assistance program sa dakbayan sa Sugbo mangayo og dugang gahin nga salapi og nangindahay nga makarga unta kini kon adunay Supplemental Budget nga ikaduso si Mayor Michael Rama.
Matud ni Ben Baculi nga gamay na lang kaayo ang nahabilin sa P30 milyones nga budget nga giaprobahan sa konseho sa dakbayan tungod kay daghan kaayo ang mi-claim sa tag P10,000 nga burial assistance.
Gipasabot ni Baculi nga P20 milyones ang gigahin sa cash assistance ug ang laing P10 milyones gigahin kini sa pagpalit og lungon niadtong mga kabus kaayo nga lumulopyo sa dakbayan sa Sugbo nga mamatay.
Si Baculi miingon nga minus ra ang mi-claim og lungon gawas lang gyud niadtong wala na gyu’y ikaabot sa pagpalit. Ang lungon nga libre nga ihatag sa dakbayan mao kadtong baratohon g’yud kaayo nga klase.
Halos kada buwan maghugop ang mga pamilyang namatyan nga mokobra sa tag P10,000 nga cash assistance. Kini maoy rason nga giibanan ni Baculi og P6 milyones ang budget nga para unta sa pagpalit og lungon.
Si Baculi nagplano nga moduso siya’g sugyot nga isukip sa Supplemental budget ang P10 milyones alang sa dugang cash assistance ug P5 alang sa paghatag og libre nga lungon.
Para sunod tuig, si Baculi miingon nga mosugyot siya og P30 milyones nga budget alang sa paghatag og cash assistance sa matag pamilya sa namatay ingon man laing P10 milyones para sa pagpalit og lungon . (BANAT NEWS)