CITOM gusto enforcer niini regular

CEBU, Philippines - Tinguha karon sa kadagkoan sa City Traffic Operations Management (CITOM) nga himoong regular ang ilang mga kawani nga nagbinuotan aron dili na sila mahadlok nga mopatuman sa balaud ngadto sa mga motorista.

Matud ni CITOM Executive Officer Rafael Christopher Yap nga usa kini sa tahas nga gisangon ni Mayor Michael Rama ngadto kang Veronica “Jovy” Morelos nga gitudlo nga bag-ong administrative officer sa CITOM.

  Samtang aduna nay ordinansa nga nahimo nga hingpit nga usa ka departamento sa Cebu City Transportation Office apan wala pa gayud kini mapatuman.

Gusto usab ni Konsehal Gerardo Carillo nga ipabilin ang ngalan nga CITOM ug dili na idayon ang paghingalan og Cebu City Transportation Office.

Gipasabot ni Yap nga kun mahingpit na nga usa ka departamento ang CITOM ug mahimo na nga regular ang iyang mga kawani, dili na kini mahadlok nga mataktak sa ilang trabaho tungod lang sa estrikto nga pagpatuman sa balaud.

Giangkon ni Yap nga adunay mga tawo nga usahay madakpan sa mga traffic enforcer nga kusog kaayo mogamit sa ngalan sa mga opisyal og ang mga enforcers mahadlok na lang mopatuman sa balaud kay basin og sila panimaslan ug mataktak ra sa ilang trabaho.

Sa laing bahin, ang CITOM mohangyo og dugang mga patrol vehicles aron paliton karong sunod tuig gikan sa iyang budget nga aprobahan unya sa konseho sa dakbayan.

 Pagka karon ang CITOM aduna lay lima ka patrol vehicles nga nagdala sa body number 501 ngadto sa 505 nga sakyan kini og polis ingon man traffic enforcers nga maglibot-libot sa dakbayan. (BANAT NEWS)