Dugang ATMs gipangsakmit

CEBU, Philippines - Dugang napulo ka coin-operated water dispensers kon Automated Tubig Machines (ATM) ug tulo ka coffee makers nga gibutang sa lainlaing bahin sa dakbayan sa Sugbo nasakmit na usab sa mga kawani sa Cebu City Hall. Matud ni Raquel Arce, hepe sa Prevention Restoration Order and Beautification Enhancement (PROBE), nga bisan og Sabado wala mohunong ang iyang mga sakop sa pagpatuman sa kamandoan sa City Hall.

Ang kamandoan mao nga gidili na ang pagbutang og mga ATM’s ug coffee makers, apil ang ubang butang nga makabalda na sa pag-agi sa mga tawo diha sa aseras.

Giuna pagsakmit sa PROBE ang mga gitawag ATMs kay makahatag kini og kakuyaw sa panglawas sa katawhan tungod sa dili kaayo luwas nga kalimpyo sa tubig.

Si Dra. Stella Ygoña nga maoy City Health officer sa dakbayan sa Sugbo mopasabot nga ang mga ATM’s nga gipahimutang ra sa aseras mahimo nga binuangan pinaagi sa pagbutang og hugaw sa agasanan og tubig. Sa unang adlaw sa pagpatuman sa miaging semana kapin sa 50 na ka ATM’s ug tulo usab ka coffee makers ang nasakmit, duna pay duha ka refrigerators nga gibutang sa aseras ang giapil.

Sa dalan Escario duol sa taytayan adunay ATM nga anaa gihapon sa aseras gibutang nga walay nagbantay. Kaniadtong miaging gabii ang operation didto gihimo sa mga dapit sa Taboan ug sa mga dapit duol sa Carbon Market. (BANAT NEWS)