Sanciangko ibalik pagka-two-way lane
CEBU, Philippines - Aduna karo’y gihimo nga pagtoon ang City Traffic Operations Management (CITOM) nga ibalik sa “two-way†ang dalan Sanciangko ug ang kabahin sa dalan Panganiban ug Katipunan sa paglaom nga makasulbad ni og gamay sa problema sa kahuot sa mga sakyanan.
Ang dalan Sanciangko, ang karsada nga manukad sa taytayan sa Taboan Public Market ug ang tumoy mosangko sa D. Jakosalem, “two-way†kini kaniadto ug gihimo ‘sab gani nga rota sa mga tartanila nga anha magbalik-balik sa maong karsada.
Apan pag-abot sa dekada 90, ang Sanciangko gihimo na nga “one-way†gikan sa D. Jakosalem paingon sa Taboan Market. Ang kabahin sa Panganiban gikan sa Sanciangko paingon sa Natalio Bacalso Avenue gihimo usab nga one-way sukad sa miaging tuig.
Matud ni Citom executive director Rafael Christopher Yap nga apilon nila ang pagtoon kun angay ba nga ibalik nga two-way ang Panganiban aron maka-right turn na ang mga sakyanan nga gikan sa Natalio Bacalso Avenue.
Si Yap usab miingon nga plano sa CITOM nga himoong two-way ang kabahin sa Katipunan Street gikan sa Tres de Abril paingon sa eskina V. Rama Avenue. Pagkakaron ang bugtong gawasanan sa mga sakyanan nga gikan sa Labangon mao ra ang Tres de Abril paingon sa Natalio Bacalso Avenue.
Giangkon hinuon ni Yap nga dili madali-dali sa pagpatuman kining maong lakang kay gitun-an pa kini sa mga sakop sa CITOM engineering section. (BANAT NEWS)
- Latest
