54% sa jeepneys ang ma-phase out sa Sugbu

CEBU, Philippines - Lapas katunga kon 54% sa kinatibuk-ang gidaghanon sa mga public utility jeepneys (PUJs) sa Sugbo ang maapektuhan kung ipa-implimentar na ang plano sa pag ban sa mga 15-year old jeepneys.

Si Land Transportation Franchising and Regulatory Board (LTFRB)-7 regional director Ahmed Cuizon nagkanayon nga aduna nay plano apan kung kanus-a kini ipatuman, wala pa kini masayri.

Matud ni Cuizon nga gitun-an pa kini  og maayo kay majority sa PUJs sa Central Visayas ang maapektuhan sa implementation  pag-ban sa 15-anyos na nga mga PUJs.

Base sa pamahayag ni Ruperto Zamora Jr., LTFRB-7 record officer, sa 15,165 ka mga rehistradong PUJs sa Central Visayas, 70% o 10,615 PUJs niini ang nagdagan sa Sugbo.

Ug 54% o 573,237 ka PUJs dinhi sa Sugbu  ang nag-edad na og 15 ka tuig pataas maong kung iimplimentar gyud ang pag-ban  maapektuhan gyud og dako ang mga sumasakay tungod kay magnihit unya ang mga kasakyan.

Nabalita na ang pag-ban sa 15-year old buses isip parte sa modernization program sa LTFRB, lakip usab niini ang mga taxi units.

Ubos sa maong programa, tanang passenger buses ug vans nga nag-edad og 15 anyos pataas ma-phase out na samtang ang mga taxi nga nagdagan sa 12 hangtud sa 15 ka tuig mao usab ang mahitabo.

Dili na i-renew ang registration of buses nga nagpangidaron og 15 ka tuig pataas sugod karung Septiyembre.

Ang transport sector namahayag nang daan nga wala sila’y problema sa pagpatuman sa modernisasyon sa transport sector sa rehiyon basta hatagan lang sila og paigong oras aron makapalit sila og bag-ong sakyanan.

Ang mga bus nga adunay plate number nga nagtapos sa “9” hangtud Septembre na lang samtang katong nagtapos sa “0” hangtud sa Oktubre na lang pud.

Matud ni Cuizon nga adunay 1,460 buses sa Central Visayas ug 70% o 1,022 niini ang nagdagan sa Sugbo. Sa total buses in the region, 40% o 584 niini ang nag-edad na og 15 anyos pataas. (BANAT NEWS)