Tourist bus nagsungag sa trak,1 patay 12 angol

CEBU, Philippines - Usa ang patay ug dose naangol sagad niini mga langyaw dihang nagkadinasmagay ang tourist bus ug cargo truck didto sa kurbadahon nga bahin sa Sityo Mandag-om, barangay Matutinao lungsod sa Badian niadtong Biyernes sa alas 3:30 sa hapon. Ang biktima nga namatay sa tambalanan kagahapon sa buntag mao ang drayber sa tourist bus nga si Marwel Catan Pucong,34-anyos, molupyo sa barangay Basdiot, Moalboal.

Samtang ang mga pasahero niining naangol mao ang mga langyaw nga turista nga sila si Genesis Campos Stephanie, 23, Australian national; Tiata Samuel, 23-anyos, Australian National; ug Weisheitinger Julia, 23- anyos, nga usa ka German  nga pulos anaa sa seryoso nga kahimtang sa pribadong tambalanan dinhi sa dakbayan sa Sugbu.

Ang ubang mga naangol nga turista nga dili kaayo grabi mao ang mga Danish nga sila si Jappesen Joan,26; Hemmingan Tine Gjerke, 27; Hanz Matias, 23; ug Soeren Just Peversen,26.

Samtang ang tulo ka mga Filipino tour guides nga naangol usab mao sila si Jimmy Tapales,46; Mario Tapales, 24, ug Erwin Abrenica nga pulos nagpuyo sa barangay Basdiot, Moalboal.

Samtang ang drayber sa gikabangga nga cargo truck nga puno sa karga sa construction materials nga dili kaayo grabe mao si Vic Cabansag, 31,  taga Bahay Lungsod sa Sibonga.

Matud ni PO2 William Beltran sa Badian Police dihang nahinabi sa Banat News sugat nga direksiyon ang duha ka sakyanan,  ang tourist bus paingon sa lungsod sa Moalboal samtang ang cargo truck paingon sa lungsod sa Alegria.

Matud pa sa mga saksi pag-abot sa kurbadahon nga bahin sa maong lugar kusog kaayo ang dagan sa tourist bus ug mikawat sa pikas linya ug maoy nakaingon sa binanggaay.

Tungod sa kakusog sa impact maayong pagkaguba sa duha ka sakyanan ug nangalamba ug napiit ang mga pasahero.

Dali silang  gihatud sa Badian District Hospital apan ang mga nagrabihan gilahos sa tambalanan dinhi sa dakbayan ug ang drayber sa tourist bus namatay kagahapon sa buntag.

Samtang nakagawas dayun sa tambalanan ang drayber sa cargo truck human kini makaangkon og minor injuries sa ulo. Ang kapulisan padayun pang nag-imbestigar kung kinsa sad-an sa maong aksidente. (BANAT NEWS)