Naa sa PDEA drug watchlist nadakpan sa NBI
CEBU, Philippines - Usa ka ginang nga nalakip sa drug watchlist sa Philippine Drug Enforcement Agency (PDEA) ang nadakpan kagahapon sa mga sakop sa National Bureau of Investigation (NBI)-7 diha sa sitio San Roque sa barangay Mambaling ning siyudad sa Sugbu.
Ang nadakpan giilang si Zenaida Amplayo, 58, residente sa maong dapit human sa gihimong raid sa NBI pinangulohan ni Atty. Larry Dominquez, pinasikad sa search warrant gikan ni Executive Judge Silvestre Maamo, human magpositibo ang ilang test buy operation sa alas 7 sa buntag.
Paglabay sa duha ka oras ang mga agents sa NBI mibalik didto ug gironda ang panimalay niini nga gituohang gihimo nang drug den, didto ilang nadakpan si Amplayo, ang anak niini nga si Pifer Gutierez, ug ang umagad nga si Giovanni Gutierez ug Bryan Amplayo.
Apan matud ni Dominquez, ang tulo comprises sa mag-asawa ug si Bryan kay subject for examination kung migamit ba kini sa ginadiling druga. Ang tulo naapil human naa man sila sa crime scene.
Duha ka small packs nga gituohang shabu ang nasakmit sa NBI ug sobra P20,000 nga gidudahang halin niini.
Si Zenaida nagkanayon nga taud-taud na siya nga nag-operate sa maong business. Apan tungod sa kalisud sa pagbuhi sa iyang anak ug mga apo kini maoy nagtukmod kaniya nga ipadayon kini.
Pasakaan og kasong pagpamaligya ug pagkupot og ginadiling shabu ang ipasaka batok kang Zenaida. Samtang gisusi pa kung unsay ipasaka batok sa tulo.(/EIM) (BANAT NEWS)
- Latest
