Managkapuyo namatay human madasmagi og minibus sa Naga

CEBU, Philippines - Duha ang patay sa panagbangga sa motorsiklo ug mini bus sa miaging gabii sa Barangay South Poblacion, Naga City.

Wala na makaabot nga buhi si Saminoding Polangi, 23, nga taga Barangay Poblacion, Minglanilla diha sa South General Hospital samtang ang live-in partner niini nga si Rose Marie Ecoy, taga-Barangay Tinubdan, San Fernando nakabsan usab sa kinabuhi paglabay sa pipila ka oras sa mao gihapong tambalanan.

Base sa imbestigasyon sa kapolisan, ang mga biktima sakay sa ilang motorsiklo (7TC 4838) samtang nagsubay sa dalan sa maong lugar dihang ang Soccoro Cruiser mini bus (GXD 211) nga gimaneho ni Dante Ricardel, taga-Barangay Minolos, Barili, nagdagan usab sa pikas linya.

Sa inisyal nga imbestigasyon ni SPO1 Alex Nable nga ang mini bus mi-overtake ug milapas sa iyang linya ug gikasugat na hinuon ang mga biktima.

Tungod sa kakusog sa impact ang mga biktima nalabay sa dalan nga miresulta sa grabeng kadaot sa ilang mga lawas nga nakaingon sa ilang kamatayon.

Si Ricardel boluntaryong mitahan sa San Fernando Police Station human sa hitabo ug git-turn over usab dayon sa Naga City Police Station aron sa pagpasaka og tukmang kaso. (/EIM) (BANAT NEWS)