ATM sa aseras sakmiton sugod karong buntag

CEBU, Philippines - Sugod karong adlawa, sakmiton na sa mga kawani sa City Hall kadtong mga Automated Tubig Machines (ATM) kun kini masakpan nga padayong gibutang  sa mga aseras.

 Matud ni City Health Officer Stella Ygoña nga ang pagbutang sa mga ATM nga gitawag og “tubig piso-piso” nakalapas sa lagda nga gilatid sa Presidential Decree 856 kon Sanitary Code of the Philippines. Si Dra. Lucille Mercado, pangulo sa Garbo Asenso Sumbanan Alyansa (GASA), miingon nga ang lakang sa City Hall wala magpasabot nga gusto nila nga “kulban sa kaldero” ang mga nagnegosyo og Automated Tubig Machines.

 Matud ni Mercado nga ang ilang tumong mao ang pagsiguro sa kaluwasan sa panglawas sa katawhan.

 Dinhi sa dakbayan sa Sugbo mikatap pag-ayo ang Automated Tubig Machines sa nagkalainlaing dapit apan anaa ra kini gipamutang sa aseras nga walay nagbantay.

 Si Dra. Ygoña nagkanayon nga peligro kaayo kun adunay mga tawo nga magbinuang ug butangan og hugaw ang agasanan sa tubig   nga makahimo og  problema sa panglawas sa mga tawo nga makainum sa hugaw.

 Ang mga sakop sa City Hall clearing team nga pangulohan nila ni Raquel Arce ug Wendell Cenas maoy tahasan sa pagpangsakmit sa mga ATM nga anaa ra sa aseras sugod karong buntag.  (BANAT NEWS)