Nigerian national nasakmita’g shabu bali’g P350 mil

CEBU, Philippines - Mikabat  sa 70 gramos nga shabu  nga  mobalor  og P350 mil  ang  nasakmit  sa mga  otoridad  sa National Bureau of Investigation (NBI)  gikan   sa usa  ka  Nigerian National   sulod  sa usa ka lodging house  sa  North Reclamation Area dakbayan sa Mandaue  sa miaging gabii.

Ang nasikop mao si James Okwudili Uyanneh, 53, molupyo sa barangay Guadalupe,

Si NBI Regional Director  Antonio Pagatpat mipadayag nga gihimo ang transaksyon sa usa ka lodge sa maong dapit diin  ang  suspek  miabot  nga  nagsakay  og  taxi.

Dihang nagkaabot na ang langyaw ug ang poseur buyer,  gitunol  dayon  sa langyaw ang susama sa usa ka card board diin didto diay gipasukip ang drugas sa sulod.

Diha-diha  gisikop  dayon ang maong langyaw ug gipahibalo sa iyang mga katungod isip dinakpan.

Matud pa ni Pagatpat nga sa ilang nakuhang impormasyon sulod na sa unom ka tuig nga nagbase sa Sugbo ang maong langyaw.

Gani, susama sa taud-taud na usab siya nga nag-operate  og ginadiling drugas sa Sugbo diin ilang gidudahan nga ang mga drugas gikan sa gawas sa nasud.

Sutaon usab sa mga sakop sa NBI kun aduna bay grupo si Uyanneh,  tungod  kay nakadawat sila  og taho nga adunay kasosyo ang maong langyaw. (BANAT NEWS)