Barrier-free sa PWD ang mga edipisyo dinhi

CEBU, Philippines - Gipakatap sa grupo sa Persons With Disability (PWD) ngadto sa katawhan nga  barrier-free  sa PWD  ang  dakbayan  sa  Sugbo alang  sa  mga turistang  may apan  sa panglawas.

Si Adela A. Kono, advocate and accessibility specialist sa PWD mibutyag kagahapon  atol  sa Kapihan sa PIA   nga  gipalanog  sa DYMR,  nga  walay angay  kabalak-an  ang  mga PWD  nga  gikan sa ubang  nasud  sa kalibotan  kun  sila  moanhi  sa Sugbo

Iyang  gipasabot  nga  ang barrier-free usa ka sitwasyon diin wala’y kakulian  nga  makababag sa  mga bakol sa ilang pagsulod-gawas sa mga building ug establisemento dinhi  sa Sugbo.     

Miingon  si  Kono  nga  kaniadtong 2011, aduna’y gipasar nga barrier-free tourism ordinance si Vice-Governor Agnes Magpale ug  Board Member Arleigh Sitoy, ug  didto gilagda ang mga tamdanan sa pagtukod og building.  Gimando sa maong ordinansya nga ang gitas-on sa reception desk, 75 centimeters lang; ang pultahan, 90 centimeters ang gilapdon ug ang kasilyas gikinahanglan nga dunay handle bars kun kuptanan sa mga bakol. “Maayo unta kun ma -implement ni og tarong. We need to break barriers in Cebu,” dugang ni Kono.

Tinguha usab sa mga PWD nga kahatagan  sila og binulan nga ayuda gikan sa gobyerno  nga sama  sa  mga senior  citizens.

Sa kasamtangan, duna sila’y financial assistance nga kausa ra ihatag.  Buot nila sundon ang pamaagi sa Thailand, Japan ug uban pang nasud sa Asya diin binulan ang madawat nga kuwartang  hinabang  sa mga PWD. Sa pagkakaron, nagpadayon ang mga PWD sa ilang hangyo nga ipatan-aw ang mga building sa Sugbo kun mituman ba kini sa barrier-free tourism ordinance.

Ilaha usab  nga imbitaron sa usa ka panagtigom ang United Architect Association of the Philippines aron mapahinumdoman sila sa tamdanan sa pag-design og mga buildings.

Karong Sabado, Hulyo 20, aduna’y ipahigayong pagtuki sa mga isyu sa PWD kauban ang mga  sakop sa Persons with Disability Affairs Office. (BANAT NEWS)