Hapon naghikog lawas dugta na

CEBU, Philippines - Nagsugod   na  og kadugta ang patay nga lawas  sa usa  ka Japanese national  kinsa  gituohang  naghikog sulod  sa   lawak sa gipuy-an niining  balay  sa Collin Wood Subdivision sa barangay Basak, dakbayan sa Lapulapu nga nadiskobrehan  sa miaging  hapon.

Si PO1 Lydo Pinos sa homicide section sa kapolisan sa maong dakbayan miila sa namatay nga mao si Junichi Ikeuchi, 54, lumad nga taga Tokyo, Japan ug nagpuyo sa sitio Hawian, barangay Basak sa maong dakbayan. Matud pa ni PO3 Pinos nga ang manager sa Pride KTV bar nga gipanag-iya sa maong  Hapon mibati  og  kabalaka  kay  tulo na  ka adlaw  nga wala na kini mobisita  kaniya. Gumikan sa maong kabalaka  gisugo  ni  Jimmy  Fernandez, manager  sa KTV bar, sa iyang anak  nga  si Junjie sa pagsusi sa   balay sa maong langyaw.

Dihang didto na kini  sa gipuy-an sa Hapon, gisugat  siya sa  daghang lagong ug langaw nga gikan  sa sulod  sa balay.

Ang labing  nakapahibulong  ni Junjie  mao ang  kabaho  sa sulod  ug  sa gawas  sa balay.

Hinungdan  nga nangayo siya  og panabang  sa guard on duty sa maong subdivision kinsa  nanawag usab sa buhatan sa kapolisan. Pag-abot  sa  mga  polis  nasuta  niini  nga  nagbuy-od  ang Hapon  nga  patay na ibabaw  sa katre   sulod  sa iyang lawak.

Si PO3 Pinos miingon nga ang mga sakop sa Crime Scene on Operation (SOCO( sa PNP Crime Laboratory miingon nga napalgan sa kilid  sa patay’ng  lawas  sa Hapon  ang kalibre .22 nga armas   nga  may unom ka buhing bala, usa ka kabhang ug usa ka nalumping  na  nga bala  niini. Matud pa ni PO3  Pinos  nga ang maong langyaw  maoy  problema  sa mga tawo  sa maong  lugar  kun mahubog  kay  manghasi  busa  kanunay kining  gireklamo sa  iyang  mga  silingan  ngadto  sa kapolisan.

Gituohan  sa kapolisan  nga  kini  naghikog  apan dugang pa ni PO3 Pinos nga ila  pa kining ipa-autopsy aron  masuta  ang  tinuod  nga  hinungdan  sa kamatayon  niini. (BANAT NEWS)