Solar power plant patun-an og maayo sa Talisay

CEBU, Philippines - Ang kagamhanan sa dakbayan sa Talisay mopahigayon pa og lawom nga pagtuon kabahin sa pagpatukod sa Solar Power Plant sa siyudad.

Si Atty. Alfredo Sipalay, city legal officer sa pakighinabi niini sa mga tigbalita nagkanayon nga ipaubos una nila sa lawom nga pagtuon ang maong gitanyag nga proyekto.

Gipasabot ni Sipalay nga dili angayang magdali-dali ang siyudad kabahin sa mga dagkung transaksiyon aron dili usab kini mabutang sa alang-alang.

Ang pagpatukod og solar power plant usa ka dakong proyekto nga kinahanglan pang estudyohan kung wala bay mga negatibo unya niining epekto sa habig sa siyudad.

Kahinumduman nga si Secretary Heherson Alvarez uban sa representante sa Hi-Tech Lightning World Corporation (HLWC) nga si Marc Cools ang mibisita kang Mayor Johnny De los Reyes ug mitanyag sa maong proyekto.

Ang planta giplanohan untang tukoron sa 10 ka ektaryang luna ug ang budget niini  mokabat ngadto sa 100,000 Euro o P580 milyones.

Giingong ang kompaniya maoy moabaga sa tanang galastohan apan ubos kini kung unsay masabutan tali sa kagamhanan sa siyudad.

Giingon usab nga kung ang maong proyekto matuman ang siyudad makabaton kini og P10 milyones nga income ug sustainable kini sulod sa 15 ngadto sa 20 ka tuig.

Ang renewable energy system giingong motanyag kini og baratong suplay sa kuryente ug posibleng makadani sa mga investors.

Ang renewable energy system ang gituohan usab nga makasulbad sa problema sa climate change. (BANAT NEWS)