Magsuon gidakop human makuhai og tagsa ka armas

CEBU, Philippines - Nadakpan sa kapulisan ang magsuon nga batan-ong lalaki diin usa niini 16- anyos nga pulos armado ug gidudahang manulis sa usa ka gasoline station sa barangay Taytay sa siyudad sa Danao niadtong Martes sa alas 6:51 sa gabii.

Ang nadakpan mao sila si Moises Camansi, 18-anyos ug manghod nga niini nga 16-anyos ug mga molupyo sa Sityo Tabok, Kanipaan, Danao City.

Ang duha ka magsuon pulos nakuhaan og tagsa ka .22 magnum revolvers nga dunay tag duha ka buhing bala.

Matud ni SPO2 Ildefonso Prosia sa Danao City Police dihang nahinabi sa Banat News nakadawat sila og tawag gikan sa mga kawani sa maong gasolinahan kabahin sa kadudahang mga lalaki nga nagbarog diha duol sa ilang establisamento tungod kay dunay nagbagal sa ilang mga hawak.

Sa pag-abot sa mga polis wala na makaugpo pa ang duha dihang girekisa ug nakuhaan sa maong mga armas.

 Walay laing gibutyag ang duha gawas sa pangangkon maong nagdala sila og armas kini tungod kay duna silay kontra ug ilang pangdepensa ang maong mga armas. Ang duha nabalhug na karun sa karsel samtang gihikay ang kasong ipasaka ug gi- refer sa social worker ang menor de edad nga suspek. (BANAT NEWS)