CEBU, Philippines - Ang kagamhanan sa Talisay gitakda nga mopadala og cease and desist order sa pagpahunong sa trabaho sa gitukod nga bodega sa South Road Property (SRP).
Si Talisay City Legal Officer, Alfredo Sipalay mibutyag sa mga tigbalita nga ang maong warehouse sa ilang pagsusi nasuta nga nahimutang sa luna sa barangay San Roque nga iyaha sa Talisay.
Apan ang tag-iya sa maong warehouse wala mokuha og permiso sa Talisay.
Gibutyag ni Sipalay nga sa miaging hapon mipadala siya og cease and desist order ngadto sa tag-iya niini.
Matud usab ni Sipalay nga may mga 11.25 ektaryang luna sa SRP habig sa barangay San Roque ang giugmad karon sa dakbayan sa Sugbo.
Apan ang Talisay walay nadawat nga abot o mga bayad sa buhis, permit ug zoning clearance niini.
Giingong ang maong luna natitulohan na ubos sa ngalan sa dakbayan sa Sugbo.
Apan gipasabot ni Sipalay nga bisan pa og natitulohan sa dakbayan sa Sugbo ang maong luna ang mga magpatukod og patigayon o mag-develop sa maong lugar kinahanglang adto mobayad og buhis sa Talisay sama sa permits ug mga clearances tungod kay ubos kini sa teritoryo sa Talisay.
Si Sipalay nagkanayon nga dili nila angkonon ang maong luna tungod kay ang titulo niini iyaha man sa dakbayan sa Sugbo.
Iyang gipasabot nga ubos sa balaod nahimutang sa teritoryo sa Talisay ang maong luna hinungdan nga ang Talisay maoy adunay katungod sa pagkolekta og buhis sa tukorong butang niini.
Hinuon karong sunod semana ang dakbayan sa Sugbo gitakdang makigsabot sa dakbayan sa Talisay bahin sa maong problema.
Si Sipalay midugang nga andam usab silang makigsabot sa dakbayan sa Sugbo bahin sa maong isyu. (BANAT NEWS)