Hiring sa DepEd hapsay

CEBU, Philippines - Hapsay ang proseso sa pagkuha og dugang magtutudlo sa Department of Education niining tuiga.

Gani hapit na makompleto ang 61,510 nga mga teacher items nga gikinahanglan karon.

Sugod kaniadtong Hulyo 12, mikabat na sa 56,0850 kon 91 porsiyento nga bag-ong maestra ang nakasulod na sa DepEd ug ang kakulangan nga 5,425 ang gisugdan na usab sa paghikay.

Sa mga bag-o nga nasulod 1,022 kon 20 porsyento niini ang gikan sa qualified local government-funded kon volunteer-teachers.

Kaniadto moabot sa walo hangtud siyam ka bulan ang paghikay  sa mga appointment sa mga bag-ong maestra sumala pa ni Asst. Secretary of Education for Planning Jesus Mateo.

Sa kasamtangan ang mga appointment mahikay  sulod lamang sa tulo ka bulan.

Dugang pa ni Mateo ang 9 porsiyento nga nagpaabot nga mahimong mosugod na og tudlo ubos sa contractual basis mentras magpaabot sila nga mahuman  og  hikay ang ilang mga papeles. Kung aduna may mga kakulian ang ilang mga papeles nga maoy hinungdan nga dili sila masulod, ang DepEd andam usab nga mobayad sa mga bulan nga ilang giserbisyohan.

Mipahinumdom si Mateo nga ang pagpasulod og dugang  mga maestra gibase sa qualifications niini dili igsapayan kung mga bag-ong graduwado o beterano man sila nga maestra. (BANAT NEWS)