Nalagpot gikan sa motorsiklo patay

CEBU, Philippines - Patay ang usa ka hubog   nga lalaki  dihang  wa niya  makontrolar  ang dagan  sa iyang  motorsiklo  ug  midasmag   sa railing  nga  puthaw  sa daplin  sa karsada  didto sa Sitio Balatic, barangay Cawayan sa lungsod sa Dalaguete   sa miaging   hapon.

Ang  biktima  nailhan  nga  mao si Rex Villahermosa, 47, ulitawo, ug nagpuyo sa maong lugar. Ang   motorsiklo niining gimaneho kolor puwa apan walay plate number.

Si PO2 Godofredo Glepa sa Dalaguete Police   Station   mibutyag  sa  Banat News nga  si Villahermosa gikan pa  sa barangay Cawayan ug paingon unta sa barangay Casay.

Apan samtang nagmaneho siya sa  iyang  motor nga  hubog,  gipakusgan  niini  ang  dagan   ug pag-abot sa kurbadahon nga  likoon, nawad-an   siya  sa control.

Hinungdan  nga  mibaliwliw  ang  dagan  sa iyang  sakyanan  ug  mideretso  kini  og  dasmag sa  railing sa karsada .

Gihulagway nga maayong  pagkalabay sa biktima og pipila ka metros buwag  sa iyang motor   dayon  mitugpa  kini  nga  ingon  og  sa misawom  nga nag-una  ang  ulo.

Ang  karsada  nga  aspaltado, wala  matarug  ug  hinuon  ang  ulo  sa biktima  maoy nabagnos   dihang  mitugpa  niini.

Misirit  ang  daghang  dugo  gikan  sa iyang  ulo  ug  dali  kining  gihatud  ngadto  sa Ildefonso Alcantara Hospital sa lungsod apan gideklarar sa mga doctor nga Dead on Arrival (DOA). (BANAT NEWS)