Traffic detectors sa siyudad palyado na

CEBU, Philippines - Ang kadaghanan sa 78 ka Computerized Traffic Signal System nga gipahimutang sa mga dagkung eskina sa lainlaing karsada dinhi sa dakbayan sa Sugbo depektoso na.

Resulta, dili na kini epektibo nga motrabaho aron mo-transmit unta og signal paingon sa central control room sa City Traffic Operations Management (CITOM) aron mogiya kun asa ang karsada nga dili kaayo daghan ang mga sakyanan.

Ang gitawag og Sydney Coordinated Adaptive Traffic System (SCATS) giinstalar sa kagamhanan sa dakbayan sa Sugbo diha sa mga eskina kaniadtong 1993.

Mga pino kaayo kini nga alambre nga gilubong ilawom sa karsada dapit sa hunonganan sa mga sakyanan duol sa traffic lights sa upat ka bahin sa mata’g eskina.

Kun ang usa ka karsada wala kaayo’y mga sakyanan nga moagi ug daghan sa pikas karsada, ang SCATS mohatag og signal sa central control system aron idugay niini ang “go signal” sa pikas karsada.

Matud ni CITOM Executive Officer Rafael Christopher Yap nga tungod sa paglabay sa daghang katuigan ang maong mga computerized traffic detectors nangaguba.

Nagtoo si Yap nga nangabugto ang alambre tungod sa kanunay’ng pagtay-og sa karsada o kaha ang pagtabon og aspalto ibabaw sa maong dapit nga gibutangan sa SCATS.

Wala makahatag si Yap og tukma nga kantidad o kaha bana-bana kon pila ang gastohon aron ayohon ang maong mga automatic traffic detectors.

Pagkakaron nagsiga gihapon ang mga traffic lights apan dili na mo-detect bisan kadtong mga karsada nga walay sakyanan nga moagi dugay gihapon ang go signal.

Naglaum unta si Yap nga ang mga konsehal sa dakbayan dili magpanuko sa pagpagahin og salapi aron mapalambo ang kahimanan sa atong traffic system. (BANAT NEWS)