DENR mibutyag sa 19 ka ‘landslide prone’ nga lugar

CEBU, Philippines - Gibutyag  kagahapon   sa Department  of  Environment and  Natural  Resources (DENR)7  ang  19  ka  lugar  sa mga  bukirang  barangay  sa dakbayan  sa Sugbo  nga  “landslide prone”  o  dali rang  modahili  ang  yuta.

Si Regional  Director  Isabelo Montejo sa DENR7 nagkanayon  nga  pipila  niini  mao  ang  Lusaran, Guba, Sirao, Taptap  ug uban pang  mga  barangay  nga  may  mga  pang-as nga  bakilid busa  mipasidaan  si Montejo  nga  angay  mangandam  ang mga molupyo  ning mga  dapita.

Miingon  si  Montejo  nga niining tanan  ang pagpangandam  maoy  labing  lig-ong  barahan  sa kaluwasan  gikan  sa  mga  katalagman  nga  moabot  nga  mugna  sa climate change.

Mao  kini  iyang  gibutyag    atol  sa Kapihan  sa PIA nga gipalanog  sa DYMR.

Gani  miingon  si  Montejo  nga  dili  kapugngan  ni  kinsa  mang  tawo  ang  mga  katalagman  sa kinaiyahan  apan  ang  bugtong  epektibong  panagang  niini  sa tawo  mao  ang  paglikay  sa dili pa  moabot.

Sa pagkakaron  giapud-apod  na  sa DENR  ang  Geo-hazard map  ngadto  sa local  government  unit  sa  kalungsoran  ug  kabarangayan sa rehiyon  7.

Ang  maong  mapa  maoy  tamdanan  sa  katawhan sa  mga  lugar  nga  delikado  sa higayon  nga  mokusog  ang  uwan.

Sa maong  mapa  makita  ang  mga  tukmang  lugar  nga  may  landslide  kung  mokusog ang  uwan  sulod  sa duha  ka  oras  o pataas.

Kini  tungod  sa  kahaguka  sa yuta  ug  mga  bato  niini nga  dali rang  molangkat  sa panahon  nga  mohumok  ang  palibot  kun  mabasa  sa uwan busa  mo-landslide.

Miingon  si  Montejo  nga sa  wala  pa  nila  ipagawas  ang  maong  mapa,  gihimo  sa taga  DENR  ang  pag-survey  sa palibot  busa  nasayran  nila  ang  mga  dapit  nga peligro sa landslide.

Naa  usab  ang  mga  lugar  nga peligro  sa baha, tsunami  ug  uban  pang  katalagman  nga  mugna  sa mag-usab-usab  nga  klima  sa  panahon.

Miingon  si Montejo  nga  may  mga  lugar  kaniadto  nga  dili agianan sa bagyo, sa pagkakaron  agianan  na,  busa ang  mga  molupyo  niini  nahimutang sa hilabihang  kakuyaw.

Apan  tungod  kay  ang  panahon  karon  dili  na  makalikay  sa kausaban  sa klima  niini,  higpit  nga  giawhag  ni Montejo  ang tanan  nga ang pagpangandam  mao  labing  hatagan  og  unang  pag-atiman. (BANAT NEWS)