Election sa parokya sa San Fernando sa Agusto 4

CEBU, Philippines - Aron masulbad  ang  kagubot sa parokya sa Vicente Ferrer sa barangay Pitalo , lungsod sa San Fernando gisabutan sa milabay nga tigum uban  ang  kapolisan  nga  kinahanglang usbon  ang  eleksyon   sa pagpili og bag-ong mga opisyal nga moduma sa parokya sa maong lugar.

Ang napili nga bag-ong Presidente sa Pitalo San Vicente Ferer Catholic Association   nga  si  Juvy Prosanos mitataw  sa Banat  News nga lihitimo ang  iyang  pagkapili atol sa gipahigayong eleksyon niadtong Hunyo 2, 2013.

Miingon  siya nga  mga  magtutudlo ang nagpahigayon   sa maong  piniliay subay usab sa  pagtugot sa Dioceses sa Sugbo.

Apan ang grupo ni Calvin Alfeche,  mipahigayon  usab  og   linaing eleksyon niadtong  Hulyo 7, 2013  nga   nagpili  kaniya isip  maoy bag-ong presidente sa parokya   

Gumikan  niini  miulbo  ang  kagubot   sa milabay’ng semana tungod kay mi-insister man ang grupo ni Alfeche nga mo-take over kini  ug  molingkod  na  sa iyang  katungdanan. Tungod sa maong kasamok miduol ang grupo nila ni Prosanos  kang  Governor Hilario Junjun Davide III sa miaging semana.

Dayon   gi-refer sila ngadto  kang Provincial Attorney Orvi Ortega   kinsa  maoy  mirekomendar  kang Sr/ Supt. Patrocenio Comendador   sa pagpahigayon  og sabot- sabot tali sa duha ka grupo.

Atol sa  pagpakigtagbo ni Sr/Supt. Comendador sa grupo ni Prosanos ug Alfeche, gikauyonan niini nga usbon ang eleksyon aron gayud matataw kun si kinsa ang tinuoray’ng gipili sa mga parokyano nga moduma sa simbahan.

Ang  eleksyon gitakda karong Agusto  4  didto sa Pitalo Elementary School sugod  sa alas 7:00 sa buntag  hangtud sa alas 3:00 sa hapon.

Nunot niini si Prosanos miawhag sa tanang parokyano sa pagbotar atol sa eleksyon aron maklaru kun si kinsa ang gisaligan nga mahimong           bag-ong lider sa maong parokya.

Una nang gireklamo sa grupo ni Prosanos nga wala taronga    sa pagdumala  ni Alfeche ang parokya tungod kay   gikagitan  kini  og  pundo  nga salapi. Gani  naputlan  og linya  sa  suga  ang simbahan  tungod  kay  duha  ka buwan  nga wala  kabayri  ang  bill  sa  kuryente  niini nga  mikabat  sa P49 mil kapin.

Una nang gika-report nga mokita  og  P5 milyones  matag tuig ang maong parokya tungod sa ka daghang debotos   ni San Vicente Ferrer.

Moduaw  niini kanunay   ang  mga  lokal  ug   langyaw  nga  mga  turista   gikan  sa bisan asang dapit   sa kalibotan. (BANAT NEWS)