NFA rice nagpabiling P27 matag kilo

CEBU, Philippines - Higpit  nga gimonitor  sa   mga  kawani  sa  National Food Authority (NFA) 7 ang  presyo  sa ilang  bugas  sa kamerkadohan  sa Metro Cebu  areas  aron  pagsiguro  nga  gibaligya  kini  sa   tukmang  presyo  matag  kilo.

Si Lucy Rosales nga maoy Public Information Officer (PIO) sa maong buhatan nga nahinabi sa Banat News kagahapon miingon   nga  ang  mga  merkado publiko sa dakbayan sa Sugbo, dakbayan sa Lapulapu, dakbayan sa Mandaue, Consolacion ug dakbayan sa Talisay  maoy  ilang  gibantayan  pag-ayo.

Gitataw ni Rosales nga may  mga taho nga  gipausbawan karon  ang presyo sa matag kilo sa commercial rice   sa tag P1 ngadto na sa P2  matag  kilo.

Hinuon  miingon  siya  nga  dili angay katingad-an nga mosaka  ang  presyo  sa bugas tungod kay naandan  kining masinati sa mga bulan nga dili pa ting-ani.

Gipaniguro niya nga mobalik ang normal nga presyo  sa bugas  unya sa  Oktobre ngadto sa bulan sa Nobembre nga maoy  ting-ani niining tuiga.

Gipasabot ni Rosales nga ang bugas sa NFA nga gibaligya sa kamerkadohan sa Sugbo sa gihapon nagpabilin sa P27   matag kilo nga maoy   ilang  presyo.

Si Rosales miingon nga adunay igong supply sa bugas ang NFA   sa  pagkakaron .

Gani  ang ilang  bodega  dinhi  sa Sugbo  may   1,180,000.000  pa ka sako nga imported rice gikan sa Vietnam ug 200,000 ang ilang ipadala ngadto  sa silingang probinsiya. (/WC)  (BANAT NEWS)