Call center agents kuwang sa sustansya
CEBU, Philippines - Ang mga lokal nga opisyales sa nutrisyon gibati og kabalaka human hisayri nga ang mga call center agent mokaon lang og ginagmay ug di pa sustansyadong pagkaon.
Atol sa usa ka pagtuon sa miaging tuig, nasayran nga kasagaran sa call center agents sa syudad sa Sugbo kusog mokaon og daghang junk foods kaysa sa mga pagkaon nga makahatag og kahimsog sa lawas.
Usa sa hinungdan niini mao ang ka limitado sa ilang panahon ug ang kasayon mapalit sa mga junk foods.
Ang maong survey gihimo ngadto sa 1,200 ka mga trabahante sa call center sa syudad sa Sugbo pinaagi sa Population Commission (Popcom) ug usab sa University of San Carlos (USC).
Matud pa ni Michael Pacios, Popcom-7 Planning Officer nga ang resulta sa survey mitug-an nga adunay taas nga insidente sa panigarilyo ug sa pag-inom og mga ilimnong makahubog sa mga empleyado sa call center.
Dugang pa ni Pacios nga nahimong rason sa mga empleyado sa call center ang kakuwang sa ilang panahon pagluto og mga pagkaon nga sustansyado.
Lakip na ang kalayo ug ang uban walay mga naninda og pagkaong tarong sa ilang gitrabahoan.
Samtang sa bahin ni Susan Orpilla sa National Nutrition Council (NNC-7),kini miingon nga ang resulta sa maong survey nakapaalarma kanila sanglit ang mga high-fat ug usab no-vegetables diet makahatag gayud og dakong risgo sa panglawas sa mga empleyado sa call center.
“They are future parents. What if these young adults are already anemic and when they get married and their anemia is not treated, they will also produce underweight children,†matud pa ni Orpilla.
Gibutyag ni Orpilla nga ang pagkakuwang og nutrisyon makaapekto gayud sa productivity sa trabahante og call center. Gipaniguro ni Orpilla ngadto sa maong mga trabahante nga gawas lang kun mokaon sila og sustansyadong mga pagkaon, dali ra sila mapukling sa sakit sa lawas.( /WC) (BANAT NEWS)
- Latest
