Nakaligis og iro way helmet patay

CEBU, Philippines - Nadisgrasya patay ang usa ka drayber sa  habal-habal  human  kini makaligis og iro didto sa Poblacion sa lungsod sa Barili niadtong Sabado sa alas 10:00 sa gabii.

Ang biktima  giilasa kapolisan  nga  mao si Vicente Laborte, 35, minyo, nagpuyo sa maong lugar ug drayber  sa  habal habal.

Si PO1 Florentino Cuadero sa Barili Police Station  mibutyag  sa Banat News  nga ang biktima gikan nga naghatud og pasahero sa merkado niadtong tungora apan sa iyang pagbalik sa agi aron unta sa pagpangita og dugang pasahero  kalit lang milabang   sa karsada  ang  usa ka iro.

Matud pa sa mga nakasaksi   nga naapiki  sa  pagpreno  sa iyang  sakyanan  tungod  sa kakusog  nga  dagan  niini.

Naigo  ang  iro  apan  mibaliwliw  usab  ang  motorsiklo  ug  pagkatumba  niini  nalagpot  ang  biktima.

Apan  didto   mabusdak  ang  ulo   sa tunga  sa karsada  nga  aspaltado.

Tungod  kay  walay  helmet nakuyapan  kini ug  gihatud  dayon  sa  mga  nakasaksi  ngadto  sa. Barili District Hospital  apan mga alas 11:10 sa gabii midesisyon ang mga doctor nga ibalhin sa tambalanan dinhi sa dakbayan.

Apan  wala  na  mahinayon  kay   namatay  kini tungod sa dakung kadaut sa ulo nga  iyang naangkon.( WC)  (BANAT NEWS)