V-hire naaksidente sa trans-central highway sa Balamban

CEBU, Philippines - Napulo ka mga pasahero ang samaran samtang anaa sa kritikal nga kahimtang ang laing upat dihang nadisgrasya diha sa barangay Cansumoroy lungsod sa Balamban pasado alas-7 sa miaging gabii.

Ang mga anaa sa kritikal mao silang Maria Blisa Hotohot; Cirilo Hotohot; Carilla Santoya ug ang drayber sa V-hire nga si Galileo Waskin Alibango.

Sa pakighinabi sa Banat News ni PO1 Johndel Romero mipadayag kini nga si Alibango nagbiyahian og Cebu-Asturias diha agi sa Transcentral Highway  apan pag-abot sa maong dapit giingong mi-overtake kini sa laing V-hire.

Apan wala lang damha nga giingong dihang gikatahong nasipyat siya sa iyang kambiyada ug nalahos na hinuon kini sa bung-aw atol sa pagdulhog dugangan pa nga wala makapugong ang brakes niini.

Matud pa ni Romero nga adunay 14 ka pasahero sa maong v-hire ug gani adunay usa ka tuig nga bata ang apil sa pasahero apan maayo nalang kay nahalog kini sa iyang inahan ug wala ra kini maunsa.

Samtang ang napulo ka pasahero nakasinati  og dili kaayo grabing samad sa ilahang kalawasan gawas lamang sa tulo ka pasahero ug sa drayber nga gidala sa tambalanan sa Sugbu.

Ang maong v-hire miguba sa signages una pa nalahos sa bung-aw. Nagtuo si Romero nga kusog gyud ang dagan sa maong sakyanan tungod kay miabot og 50-metros ang skidmark sa ligid niini.

"Grabi gyud, guba gyud kaayo iyang sakyanan pero nakaluy-an tawon sa Ginoo kay walay casualty bisan og kusog-kusog to iyang dagan," matud pa ni Romero sa Banat News.

Kasamtangan pa karun nga nagpaalim ang upat ka tawo nga nagrabihan sa maong aksidente samtang ang uban usab nga pasaherong samaran uban niini giingong nakagawas na sa tambalanan.

Kahinumduman nga niadtong tuig 2010, adunay 21 ka mga Iranians ang nakabsan sa kinabuhi samtang di mominos 30 ka mga kauban usab niini ang samaran human natagak ang tourist bus sa bung-aw sa maong dapit. (BANAT NEWS)