San Pedro Calungsod, Pope John Paul II pabuhata’g estatwa

CEBU, Philippines - Ang Archdiocese of Cebu ug ang Ayala Group sa Cebu, Cebu Holdings Inc., nagkasabot nga magtukod og estatuwa alang sa pag-commemorate sa pagkahimong Santos ni St. Pedro Calungsod ug sa umaabot nga santo nga si Blessed Pope John Paul II.

Matud ni Monsignor Achilles Dakay, ang tigpamaba sa Archdiocese of Cebu nga si Cebu Archbishop Emeritus Ricardo Cardinal Vidal ug Cebu Archbishop Jose Palma dunay diskusyon kabahin sa maong plano kauban sa management sa Cebu Holdings Inc. sa miaging adlaw.

Si Cebu Holdings Inc. president Francis Monera nagkanayon nga ang paghimo sa estatuwa ni Pope John Paul II, ibutang sa Cebu Asiatown IT Park isip usa sa mga highlights sa 25th anniversary sa ilang kompanya karung tuiga.

Si Vidal maoy unang misugyot sa ideya nga himoan og estatuwa si San Pedro Calungsod kay ang International Eucharistic Congress karun nang 2016. Matud ni Dakay nga ang estatuwa ni St. Pedro Calungsod anha ibutang sa South Road Properties (SRP).  (BANAT NEWS)