CTO, CCPO miinspeksyon sa mga bars
CEBU, Philippines - Gihingusgan sa dakbayan sa Sugbo ang pag-implementar sa local nga balaud batok sa mga imnanan sa nagkadaiyang bahin sa dakbayan.
Byernes sa gabii, gironda sa composite inspection teams ang mga imnanan sa Mango Avenue, downtown area, ingon man IT Park sa barangay Apas.
Ang composite team naglangkob sa mga opisyal sa City Treasurer’s Office (CTO) inubanan sa kapolisan kinsa mutan-aw sa mga establisamento kung wala ba kini makalapas sa anti-noise ug anti-liquor ordinance nga sagad maoy hinungdan sa pagpasirado sa usa ka imnanan.
Gipasabot ni City Administrator Atty. Jose Marie Poblete nga kini dugay nang programa sa administrasyon ni Mayor Michael Rama ug dili lamang isip tubag sa bag-uhay nga kontrobersya nga gikalambigitan ni Konsehal Gerry Carillo.
Usa ka grupo sa mga college students ang mipauli na lamang gikan sa usa ka bar sa IT Park human giduol sa inspection team ug gipangayuan sa ilang ID diin nasuta nga wala pa maabot sa 21 ang ilang mga edad.
Sigon sa local nga ordinansya kabahin sa pagbaligya sa ilimnong makahubog, dili mamahimong baligyaan kadtong nag edad ubos sa 21 anyos tungod kay sila gitawag pang menor de edad. Pasabot sa taga CTO, kung mo-insister ang mga batan-on sa pagpadayon sa pag-inom, ilang kuhaon ang ilang pangalan ingon man ang ngalan ug contact number sa ilang ginikanan aron pahimangnuan kabahin sa balaud.
Mipiyait ang manager sa bar ug miingon nga napagan ra sila sa panghitabo kalabot ni Carillo.
“Tungod ra man gyud ni atong balitaa ba. Last mi nga gianhi og inspection team kay kadto pang 2011. Mga suki ra ba unta to namo nga grupoha. Pero wala tay mahimo kay mao man kaha nay balaud,†siya mitug-an sa Banat News. (BANAT NEWS)
- Latest
