COA gikatakdang mokiha sa assistant ni Rama
CEBU, Philippines - Ang Commission on Audit (COA) nag-andam na karon sa mga dokumento aron magsuporta sa pagpasaka og kaso batok sa usa sa mga administrative assistants ni Mayor Michael Rama nga wala maka-liquidate og dul-an sa P4 milyon nga cash advance gikan sa City Hall.
Nagbase sila sa suwat nga ilang nadawat gikan ni Cebu City Accountant Diwa Cuevas nga nagpahibalo nga si Carlos “Charlie†Reyes wala gyud makahatag og kwentada kun giunsa niya paggasto ang nakuha niya nga cash advances kaniadto pa’ng miaging tuig.
Ang suwat ni Cuevas nga gipadala sa COA nagkanayon nga sa kinatibuk-an nga P4.6 milyones nga cash advance nga nakuha ni Reyes kaniadtong 2012, miabot pa og kapin sa P3.9 milyones ang wala niya mahatagi og kwentada.
Matud ni Cuevas nga makadaghan na sila mipadala og demanda ngadto kang Reyes nga mosumiter na siya og kwentada kun giunsa niya sa paggasto ang iyang cash advance apan nagpabiling pakyas si Reyes mao nga wala na siya hatagi sa iyang sweldo.
Ang Article 217 sa Revised Penal Code ingon man ang lagda sa Government Accounting and Auditing Manual (GAAM) naglatid nga ang kapakyas sa usa ka government officials and employees sa pag-liquidate sa kwarta sa kagamhanan nga gitugyan kanila magsilbi nga basihanan nga kini gigamit nila sa personal.
Si Reyes gihatagan og katungod nga makakuha og daku nga cash advance nga kwarta sa kagamhanan aron nga gastohon sa pagpatuman sa mga sports program sa administrasyon ni Mayor Rama.
Kasaligang tinubdan diha sa COA nagkanayon nga hatagan g’yud og pagtagad sa mga graft investigators kining maong kaso ni Reyes kay naglambigit kini og daku nga kantidad. (BANAT NEWS)
- Latest
