Kaso sa dengue sa Cebu City ni-menus

CEBU, Philippines - Minus ra ang gidaghanon sa mga tawo nga natakboyan og dengue dinhi sa dakbayan sa Sugbo gikan sa Enero ngadto sa Hunyo karong tuiga, apan duha gihapon ang namatay.

Si assistant Cebu City epidemiologist Durinda Macasocol miingon nga mas bentaha na lang sa unang unom ka buwan karong tuiga kay aduna la’y 964 ka kaso sa dengue kun itandi sa sama nga termino kaniadtong miaging tuig nga miabot g’yud og 1,567.

Matud ni Macasocol nga kun gikan sa Enero ngadto sa Hunyo 30 karong tuiga duna na’y duha nga namatay, mas ubos gihapon kini kun itandi sa unom nga namatay sa sama nga termino sa miaging tuig.

Gibutyag ni Macasocol  nga 38 porsiyento ang pagkunhod sa gidaghanon sa mga kaso sa dengue sa unang unom ka buwan ning tuiga kun itandi sa tuig 2012 ug tungod sa pag-abag sa katawhan.

Ang statistics nagpakita nga adunay 13 ka barangay dinhi sa dakbayan sa Sugbo nga wala gayo’y bisan usa ka kaso sa dengue  ug ila nga gidayeg ang mga opisyal niining maong mga barangay.

Makita sa rekord nga kadaghanan sa mga biktima sa dengue didto gidala sa Cebu City Medical Center (CCMC), dayon ang ospital nga sunod nga daghan og pasyente sa dengue mao ang Chong Hua Hospital. (Rene U. Borromeo/EIM) (BANAT NEWS)