2 ka drug pusher sikop

CEBU, Philippines - Nadakpan  sa kapolisan  ang duha ka mga tigpayuhot og gidiling drugas sa lungsod sa Tuburan nga daan  na   sa  ilang watchlist, atol sa buy bust operation  didto sa barangay Dos, sa maong lungsod  niadtong Huwebes sa alas 7:30 sa gabii.

Ang mga nasikop mao sila si Micheal Ortega, 35, minyo,  nga nagpuyo sa barangay Cogon ug Wendell Regor, 32 anyos, ulitawo nagpuyo sa barangay Dos.

Lima ka paketing   gisudlan  sa gituohang shabu ang nasakmit gikan  sa mga suspek.

Lakip  usab  niini   ang usa ka pakite nga maoy giingong  gipalit sa police  decoy og  P400.

Si PO2 Vicente Chavez sa Tuburan Police Station mibutyag  sa Banat News   nga ang kapolisan  sa sayo  pa  nakadawat og report  bahin sa duha ka suspek nga nagmotor nga nahiabot sa maong lugar ug namaligya og gidiling drugas.

Daling milusad og buy bust operation ang kapolisan  nga  gipangulohan sa hepe nga si Sr. Insp. Florendo Fajardo.

Migamit  usab  sila  og  usa ka  poseur buyer nga polis   nga  maoy  nagpakaaron  ingnon  nga  buyer  sa maong  higayon.

Ang suspek nga si Regor maoy mitunol sa  usa  ka  gamay  nga  putos   ngadto sa polis nga nagpakaaron-ingnon nga customer. Sa   pagdawat niini sa   kuwarta  milihok  dayon  ang  kapolisan  aron  sa pagdakop  sa maong  suspek.

Dihang gikapkapan ang duha, si Ortega nakuhaan  og laing upat ka pakite sa gituohang shabu ug gisikop dayon kini ug gibalhug sa karsel.

Ang kapolisan mikonpirmar nga  ang duha ka pusher   daan  na  sa ilang watchlist sa lungsod apan unang higayon  nga   sila nasikop. (Darrel A. Carumba/WC) (BANAT NEWS)