P355 mil nasakiyo sa mangingilad

CEBU, Philippines - Mokabat sa P355,000 nga salapi  ang  nasakiyo  sa  mga mangingilad   gikan  sa usa ka babaye  nga gikasugat niini sa dalan A. Rosario sa barangay Centro sa dakbayan sa Mandaue   sa miaging  buntag.

Si PO2 Jeffrey Neis sa Investigation Detection and Management Bureau (IDMB) sa Mandaue City Police Office (MCPO) miila sa biktima nga mao si Maester Imperial, 62 , minyo, nga taga dalan Hernan Cortes sa barangay Subangdaku sa maong dakbayan.

Matud pa ni PO2 Neis nga  gikan pa ang biktima sa  Gaisano Capital sa barangay Centro  ug mopaingon unta kini sa usa ka fast food chain sa atbang   kay  maniudto.

Apan samtang naglakaw kini paingon sa nahisgotang fastfood chain,  iyang nasugatan ang usa ka English speaking nga lalaki kinsa nagpatuo nga Malaysian national ug   nagpatultol  sa  bangko.

Kini  mitug-an  nga  modeposito  siya  og  $150,000 nga  gisulod lang sa   usa  ka brown envelop.

Samtang nakighinabi ang biktima sa maong lalaki may miduol  na  usab  nga  duha ka lalaki ug laing duha ka babaye ug nangutana sa problema sa maong langyaw.

Si PO2 Caputolan miingon nga ang duha ka babaye ug duha ka lalaki maoy nagkombinser  sa biktima nga ilang tabangan kay usa kini ka langyaw ug wala masinati sa maong dapit.

Miingon  sila  nga  basin  unya  kuno  mabiktima kini sa dautang mga tawo nga masugatan niini.

Sa pagsiguro nga dili mahanaw ang brown  envelop nga gisudlan sa biktima   sa iyang  idepositong  kuwarta gipagunitan  niya kini  sa biktima   paingon  ngadto sa  PNB nga nahimutang sa Gaisano Capital sa barangay Centro.

Dihang didto na sila sa ATM machine sa nahisgotang bangko ang duha ka lalaki ug laing duha ka babaye  miawhag  sa biktima nga mag-withdraw sa ATM niini og dakong kantidad nga salapi ug isulod lamang sa brown envelop nga gipagunitan  kaniya.

Matud pa ni PO2  Caputolan nga human maka-withdraw ang biktima sa iyang salapi  sa bangko ang duha ka mga lalaki  miawhag na usab sa biktima nga isulod ang   iyang salapi   nga gi-withdraw  sa gidala niining brown envelop.

Si PO2 Caputolan miingon nga  human  niini  nananghid  ang  grupo   nga manglakaw kuyog sa Malaysian national kay adunay  paliton.

Ang biktima  nagpabilin    nga nagbarugbarog sa daplin sa karsada nga nagsipit sa brown envelop nga gituohan niini nga maoy gisudlan sa dakong kantidad nga dolyar ug salapi nga iyang  gi-withdraw.

Milungtad   og pipila ka oras nga nagpaabot ang biktima sa maong dapit hangtod nga nakahukom na kini sa pagpauli.

Apan  sa  pag-abot  niya  sa  ilang  balay   nakurat  ang  biktima  kay  pulos  ginunting  nga  papel  ang  sulod  sa envelop   ug  wala  usab  didto  ang  iyang  kaugalingong  kuwarta  nga  gi-withdraw   gikan  sa  ATM.

Nakahukom  siya sa pagtug-an  niini  ngadto  sa kapolisan.

Sa  pagkakaron  padayong  gipanid-an  sa kapolisan  ang  grupo  nga  miilad  sa biktima. (Romeo T.  Limpangog/WC) (BANAT NEWS)