OFW namatay sa kulata

CEBU, Philippines - Namatay sa kulata, kini maoy nakitang hinungdan sa kalit nga kamatayon sa suspek sa pagpatay sa duha ka mga tiguwang nga babaye sa lungsod sa Malabuyoc sa miaging adlaw.

Base sa resulta sa usa ka medical examination, namatay gyud sa mga nahiagumang bun-og ang kanhi  Overseas Filipino Worker nga si Cristobal Alaban,31, kinsa gituohang nalisoan sa pangisip .

Siya maoy suspek sa pagpatay pinaagi sa pagbunal-bunal og pala sa mga ulo sa iyang iyaang si Salustiana Develleres,64, ug sa iyang guardian nga si Leonilla Paro, 76,  diha sa Barangay Monteñeza niadtong Miyerkules.

Matud pa sa hepe sa Malabuyoc Police Station nga si Chief Insp. Roseller Paller, ang resulta sa post-mortem examination nga gihimo sa municipal health officer sa Malabuyoc ngadto kang Alaban nagpakita nga namatay kini tungod sa “intracranial haemorrhage secondary to traumatic head injuries.”

“Makita nga ang pagpamun-og g’yud ang hinungdan namatay siya,” sigon pa ni Paller, ang post mortem examination dili susama ka kompleto sa awtopsiya.

Gikan sa Malabuyoc, si Paller mibiyahe paingon sa dakbayan sa Sugbo kagahapong adlawa bitbit ang letter request nga iya unyang ihatag sa PNP Crime Laboratory aron maawtopsiya pag-usab ang lawas ni Alaban.

Matud pang Paller, girekomendar sa municipal health officer nga ipaawtopsiya ang lawas ni Alaban aron makumpirmar ang resulta sa post-mortem exam.

Ang kapulisan sa Malabuyoc nangita na usab karon sa mga tawo nga mikulata sa maong suspek alang sa posibleng pagpasaka sa kasong pagpatay.

Si Alaban, kinsa bag-ohay lang naabot gikan sa Saudi Arabia, giingong adunay gipamati sa lawas dihang nahitabo ang krimen.

Matud pa nga kalit kining nag-wild samtang nagpaabot sa herbal medicine nga ipatumar unta kaniya sa binisaya nga paagi sa pagtambal ug maoy nadagmalan ang maong mga tiguwang.

Sumala pa nga gibinaklid na kini ug gigapos ug naputos og mga bun-og dihang naabtan sa mga mirespondeng mga polis.

Gitanggong siya sa police station apan kalit nga nakuyapan ug namatay samtang gidagan ngadto paingon sa ospital. Gituohan sa kapulisan ug ang pamilya usab nakadawat na nga ang suspek posibleng nalisoan sa pangisip maong iya kadtong nabuhat. (Niña G. Sumacot/EIM) (BANAT NEWS)