Liquor licensing commission sa siyudad di seryoso?

CEBU, Philippines - Dili kaayo seryoso ang mga sakop sa Liquor Licensing Commission sa Cebu City Hall nga mohimo’g kampanya batok sa mga namaligya og ilimnon nga makahubog diha duol sa mga tunghaan. Daan na nga si Mayor Michael Rama mipadayag nga dili siya mohatag og special permit sa mga balay-patigayon aron nga katugotan sila nga makabaligya og mga ilimnong makahubog kun anaa sa”prohibited area” ang ilang tindahan.

Ang giila nga prohibited area mao ang mga dapit nga nasulod sa 100  ka metros gikan sa mga tunghaan, ospital, simbahan ug public plaza.

Karong bag-o lang, nabulgar nga adunay duha ka grupo sa mga batan-on nga nagkasambunot human sila mangahubog diha sa imnanan dapit sa dalan Pelaez nga nahimutang sulod sa 100 ka metros sa University of San Carlos.

Ang Liquor Licensing Commission midali-dali og andam sa closure order sa mao nga balay-patigayon nga namaligya og ilimnong makahubog bisan wala gani business permit, labaw na ang permit pagpamaligya og bino ug beer.

Ang Liquor Licensing Commission mipahibalo pipila ka buwan na ang nakalabay nga irekomendar nila nga pasirad-an ang usa ka imnanan nga anaa mahimutang sa Sanciangko eskina Pelaez kay duol gihapon kini sa University of San Carlos ug nabantayan nga gihugopan kini sa mga tinun-an sa gabii.

Apan ang grabe nga kalapasan nahimo sa usa ka ilado nga tindahan nga namaligya og lainlaing matang sa pagkaon apan modalikyat usab pagbaligya og beer sa mga customer bisan ang tindahan anaa mahimutang sa building mismo sa tunghaan sa dalan Colon.

Si Mayor Michael Rama miingon nga iya kining ipasusi ang report nga iyang nadawat. Daghan usab nga mga baligyaanan og mga pagkaon apan nag-sideline usab pagbaligya og beer diha duol sa Basilica del Santo Niño ug sa Vicente Sotto Memorial Medical Center. (/EIM) (BANAT NEWS)