‘Pusher’ napusilan, 2 ka kustomer sikop

CEBU, Philippines - Napusilan ang usa ka suspetsadong drug pusher ug nadakpan ang duha ka giingong kustomer niini atol sa gilusad nga buybust operation sa bukirang bahin sa Sityo Lahug barangay Mantalongon sa lungsod sa Dalaguete niadtong Miyerkules sa alas 10:00 sa gabii.

Ang napusilan nga suspek mao si Crispin Gabrines, 27 anyos, nagpuyo sa Poblacion, Dalaguete samtang ang giingong iyang duha ka kustomer mao sila si Nolly Rodrigo, 28-anyos, ug Alvin Guttierrez, 22 anyos nagpuyo sa maong lugar ug pulos nakuhaan og paketeng shabu.

Matud ni Insp. Dexter Basiergo, hepe sa Dalaguete Police dihang nahinabi sa Banat News  nga nakadawat sila og report nga mitungas sa maong barangay si Gabrines aron mamaligya og shabu tungod kay dunay gihaya nga minatay sa maong barangay. Gamit si PO2 Arnel Calisong isip posuer buyer uban sa ilang confidential asset gipalitan nila ang suspek og shabu apan nakabantay kini ug midagan dayong bunot og armas.

Tungod niini giunhan siya sa pagpusil ni Insp. Basiergo apan natagak ang suspek sa walog hinungdan nga gigukod sa mga polis ug naabtan kini distansya na og 150 metros gikan sa maong walog.

Na-recover usab diha sa walog ang kalibre .38  revolver nga may duha  ka buhing bala.

Samtang nakuha gikan kaniya usa ka medium size nga putos nga dunay sud nga  gidudahang shabu nga gibana banang mohalin og P5 mil.

Samtang ang duha ka giingong customer ni Gabrines   nakuratan na lang sa pag-abot sa mga polis ug wala na makadagan pa gikan sa payag diin sila nanuyop ug nakuhaan sila og tulo ka paketeng shabu.

Si Gabrines gidala pa sa tambalanan tungod sa samad   pinusilan sa paa apan gwardiyado kini karun.( /EIM) (BANAT NEWS)