Driver gipusil angol sa nag-motor

CEBU, Philippines - Kritikal ang kahimtang sa  usa  ka  drayber  sa  habal-habal  human kini pusila sa duha ka wala  hiilhing  kriminal nga  nagsakay  og  motorsiklo  didto sa barangay Maslog siyudad sa Danao niadtong Martes sa alas 10:50 sa gabii.

Ang  biktima  nga  si  Rolly Calderon, 33, drayber  sa habal-habal  ug  nagpuyo  sa maong  lugar,  gitumbok  nga  iladong  kawatan  ug  tulisan  sa  maong  dapit.

Ang  mga kriminal  nagtaptap  og  panapton  sa ilang  dagway  aron  dili mailhan. Si PO2 Roselo Campo sa Danao City Police  Station miingon  nga ang biktima  naglingkod -lingkod sa iyang motorsiklo  nga nagpaabot  og  pasahero  sa maong  lugar  dihang  kalit  lang  miabot  ang  mga kriminal. Mihunong  kini  duol  sa biktima  dayon  nanaug  ang  angkas  sa likud  ug  milanit sa  iyang  armas  de fuego.

Diha-diha   gitirohan  sa makadaghang  higayon  ang  biktima  ug  nabulit  kini  sa samad  duol  sa kinatawo, bagtak, tuong tiil ug walang tuhod  ug  uban  pang  bahin  sa lawas.

Sa  pagtuo  nga  namatay ang  biktima ,  dali  kaayong  mibalik sa pagsakay  ang  maong  kriminal  ngadto  sa nagpaabot nga  motorsiklo  ug  mibiya  dayon. Samtang  ang  mga  nakasaksi  sa maong  krimin  maoy  mihatud sa biktima   ngadto sa Danao City District Hospital.

Gibalhin  usab  dayon  kini  sa tambalanan  sa dakbayan  sa Sugbo ug gihulagway nga anaa sa seryuso nga kahimtang.

Dugang nahipos nga impormasyon sa kapolisan  nagkanayon  nga ang biktima notadong kawatan ug tulisan sa ilang lugar ug mao kini karon ang sentro sa imbistigasyon sa  kapolisan.

Nalantawan  usab  nga  posibling panimawos ang motibo niini ilabi na kadtong  mga  nabiktima niini. (BANAT NEWS)