2 ka tawo misulti nga si Carillo wa mamunal og bato

CEBU, Philippines - Duha ka tawo ang mipadayag nga dili gayud si Konsehal Gerry Carillo ang mamukpok og bato  sa ulo sa 16-anyos nga bayong-bayong  didto  sa barangay Kamagayan  ning  dakbayan  sa Sugbo  sa  miaging  Domingo  sa kaadlawon.

Samtang ang tanod usab sa barangay Kamagayan mihimakak   sa  mga  pasangil  nga  naglambigit    sa  konsehal sa  maong insidenti.

Gani  si  Konsehal  Carillo  miawhag  nga  ipaimbistigar  sa National  Bureau  of  Investigation (NBI)  ang  maong  hitabo.

Usa ka bouncer sa Kuerks Resto Bar nga nagdumili sa paghatag sa iyang ngalan, mipadayag nga didto  mahitabo  sa gawas nga bahin  sa  bar   ang  maong pagbunal  og  bato  sa ulo  sa biktima.

 Ang usa ka 13-anyos nga batan-on nga miangkon nga diha siya atol sa insidenti miesplikar nga dili ang konsehal   maoy mibunal  og  bato  ngadto  ni  Joseph Pugoy.

Matud pa sa batan-on nga nagkarambol ang mga grupo sa batan-on uban ang biktima ug gani, dihang natumba na ang biktima  sikopon  unta kini  sa  mga  tawo apan   mibangon  kini  ug  mikabad  og  dagan  nga wala  kini  nila  hiapsi.

Dugang pa sa batan-on nga diha siya sa waiting shed  atol  sa  maong rambol sa grupo sa  mga  batan-on.

Apan wala gyud siya makakita sa konsehal nga miapil ug mipukpok   og  bato  sa ulo sa biktima niadtong higayona.Samtang ang tulo ka tanod sa barangay Kamagayan nga sila  si  Flaviano Arganda; Jesus Abao ug Ranulfo Bacalso   nga nahimutangan sa  Kuerks Resto Bar mipadayag nga dugay na nga walay tanod nga nadestino sa maong dapit.

Si Arganda miingon  nga niadtong  2011 pa nga walay   gidestino  nga tanod sa maong lugar tungod  sa mga kagubot nga mahitabo  kasagaran  sa maong dapit.

 Dugang pa ni Arganda nga niadtong Domingo sa kaadlawon wala sila makadawat og alarma  gikan sa mga tagdumala sa  bar  nga  may dakong  hitabo  sa maong  lugar.

Gipadayag usab ni Arganda nga posibling nasaypan lang nga tanod ang tawo nga kuyog sa konsehal nga diha sa maong dapit niadtong tungora. Samtang ang hepe sa kapolisan sa dakbayan sa Sugbo Sr. Supt. Mariano Natuel Jr., mipadayag usab nga lig-on  ang nakuha nilang affidavit gikan sa mga saksi   nga  mitumbok   kang konsehal Carillo  nga  maoy mibunal  og  bato  sa ulo  sa biktima. Gani, ila na lang nga gipaabot karon  ang pamahayag gikan sa biktima mismo nga magtumbok nga ang konsehal gayud ang responsabli sa maong insidenti.

Matud pa ni Natuel nga kasong serious physical injuries in relation sa child abuse ang posibling ipasaka batok sa konsehal kun ugaling mapamatud-an nga kini mao gayud ang responsabli.

Nasayran   nga niadtong Domingo sa kaadlawon nagrambol   ang  mga  batan-on   sa gawas nga bahin sa Kuerks Resto Bar diin gilangkuban  sa mga batan-on lakip na ang biktima ug giingong kalit nga gihapak og bato   sa konsehal ang biktima.

Apan  gihimakak  kini  sa kampo sa konsehal ug  mismo  si   konsehal  Carillo  miawhag  og  imbistigasyon  sa  maong  kaso  pinaagi  sa NBI. (BANAT NEWS)