Wine shops duol sa lahug elem.school ipasusi ni Rama

CEBU, Philippines - Gipasusi ni Mayor Michael Rama kun nganong nahatagan og business permit ang duha ka wine shops nga anaa mahimutang sa Gorordo Avenue unahan sa Lahug Elementary School nga walay tukma nga parking area sa mga sakyanan sa ilang customers.

Tungod kay walay maayo nga parking area ang maong mga wine shop ang mga sakyanan sa ilang customers anha ra iparada sa daplin sa karsada ug makabalda kini sa pag-agi sa mga sakyanan.

Ang dakbayan sa Sugbo adunay ordinansa nga naglatid nga kadtong mga balay-patigayon nga mag-operate daplin sa karsada kinahanglan sila nga adunay parking area ug nga dili “diagonal type” ang pag-parking.

Ang gilatid mao ang “parallel type” diin ang mga sakyanan i-parking lumbay sa bungbong sa balay-patigayon ug nga adunay tukma nga lugar alang sa parking sa mga sakyanan.

Nabantayan nga ang duha ka balay-patigayon nga namaligya og mga bino dili layo sa usa ka Temple sa mao nga lugar maoy pundokanan sa daghang mga tawo panahon sa gabii nga ang mga sakyanan anha ra i-parking sa karsada.

Gusto usab ni Mayor Rama nga masuta kun ang maong lugar wala ba masulod sa 100 ka metros nga gilay-on gikan sa Temple nga gidili basi sa City Ordinance 1413, ang Liquor Ordinance sa dakbayan. (BANAT NEWS)