Walo ka dinakpan
CEBU, Philippines - Pasakaan karong adlawa og kaso sa National Bureau of Investigation (NBI)-7 ang walo nila ka dinakpan niadtong Lunes sa hapon nga may kalambigitan sa illegal drugs diha sa Cebu City Prosecutor’s Office.
Si Regional Director Antonio Pagatpat nagkanayon nga kasong illegal selling of shabu, illegal possession of shabu and drugs paraphernalia ang ipasaka batok nila ni Jhonilito Mayol, subject sa buy bust, Anna Roa, Romeo Baylon, Junrey Anseo, Archie Cabrellos, Ferdinand Jugador, Jontahn Cortes ug Christopher Dizon.
Samtang laing kaso usab nga illegal possession of firearm and ammunitions ang ipasaka usab batok kang Baylon tungod sa nakuhang paltik nga M16 rifle nga 9mm submachine gun ug mga buhing bala niini.
Ang NBI pinangulohan ni Atty. Bernard dela Cruz naka-recover og dagkong unom ka paketeng shabu, usa ka gamay’ng pakete, armas ug drugs paraphernalia nga gibanabanang moabot sa 300 gramos nga may street value nga P1.5 milyon.
Matud ni Pagatpat nga ang ilang operasyon usa ka tubag sa call ni Mayor Michael Rama batok sa illegal drugs sa syudad.
Duha ka buwan nga surveillance ang gihimo sa NBI una pa gilusad ang operasyon diha sa balay ni Mayol sa Highway 77, sa Barangay Talamban, Cebu City. (BANAT NEWS)
- Latest
